REGIONAL Aviation Ministers Meeting (RAMM) i bin kamap long Pot Mosbi we gavman bilong PNG i bin hostim.

Dispela bung i bin kamap bihain long Pasifik forum i wanbel long dekleresen bilong Pot Mosbi long eviesen seifti na sekyuriti.

OL Minista husat i sanap makim sivil eviesen na ol sinia eviesen opisa bilong 14 Pasifik Ailan i bin holim dispela bung bilong mekim kamap opisal ol wok bilong eviesen long Pasifik rijon. Long dispela bung sampela i bin patisipet long zoom.

Ol Pasifik kantri i bin patisipet long dispela RAMM em Australia, Cook Islands, Fiji, French Polynesia, Kiribati, Nauru, New Caledonia, New Zealand, Niue, PNG, Samoa, Solomon Islands, Tuvalu na Vanuatu.

Dispela i bin namba wan bikpela bung ol Minista i bin holim stat long kamap bilong Pasifik Sivil Eviesen Seifti na Sekyuriti triti long 2004.

Rijon i save bungim planti salens bilong kamapim na mentenim seif, sekyua na strongpela sastenabol envairomen we yumi ken dipen long en bilong kamapim  gutpela ikonomi bilong sivil eviesen sistem. Dispela i kam wantaim pasin bilong harim tok na bihainim ol lo bilong International Civil Aviation Organisation (ICAO) stendet. Na tu hevi bilong  COVID-19 long eviesen.

Siaman bilong RAMM na Minista bilong Sivil Eviesen long PNG, Sekie Agisa i tok “ Dekleresen bilong Pot Mosbi em gutpela win we i strongim ol komitmen bilong taim bipo na bai givim ol nupela tingting bilong kamapim rot bilong kisim sastenabol eviesen seifti na sekyuriti.”

Em i tok maski i gat planti salens, pasin bilong wokbung wantaim i ken helpim long kisim ol strongpela eviesen seifti we i bihainim stret ol lo bilong sekyuriti.

Dispela dekleresen i soim olsem ol Pasifik gavman i mekim komitmen long kamapim rot bilong strongim seif na sekiua eviesen. Bikos dispela em impoten samting long strongim koneksen na sastenabol divelopmen long Pasifik.

Seketri Jeneral bilong Pasifik Islands Forum, Henry Puna i tok “ Yumi mas senisim tingting bilong yumi na stat long painim ol nupela rot bilong kamapim moa seif na sekyua na sastenabol eviesen sekta. Bai promotim spirit bilong Blue Pasifik.

Ol Minista i bin toktok na wanbel long strongim wok bilong eviesen na adresim ol hevi bilong eviesen na tu impruvim wok bilong eviesen long rijon. Narapela bung bilong RAMM bai kamap

Carolyne Ketsimur i raitim