Bank of South Pacific i givim tenk na nupela ol desk long St Montfort praimeri skul long mani mak olsem K30, 000. Dispela tupela projek bai helpim 1000 sumatin long Kiunga.

Ol wok manmeri bilong BSP i kisim tupela wik long stretim tupela projek wantaim. Ol i helpim long penim wanpela klasrum na tu ol i mekim simen long hap bilong putim tenk.

Het masta bilong St Montfort praimeri skul Pancres Lawrence i tok bikpela amamas i go long BSP. “Ol sumatin bai sindaun long ol gutpela desk na em ba helpim ol long mekim ol skul wok bilong ol Lawrence i tok.”

Dispela skul i bin i no bin gat gutpela wara na nau wantaim helpim bilong BSP ol sumatin bai gat gutpela wara long dring.

Jenerel Menesa bilong BSP Daniel Faunt i tok mipela i bin wok long Kiunga bipo tru long 1983 i kam inap nau na mipela i bin helpim ol komyuniti wok long mak olsem 36 projek long mani mak olsem K825,000.

Brens Menesa bilong Kiunga Ivy David i tok, olsem wanpela bikpela hap bilong lukautim mani insait long Pasifik mipela i save laik long givim samting i go bek long komyuniti olsem edukesen, helt na ol narapela komyuniti wok.

Dispela projek em i wanpela bilong ol projek BSP i bin givim long Westen Provins.

Wankain wok tu bai i kamap long BSP Daru na Tabubil long sampela skul ol yet i makim pinis.

Daru Bres Menesa i tok ol tu i statim wanpela projek bilong ol pinis. Ol bai givim dispela projek i go bek long dispela skul.

Samantha Solomon i raitim