AUSTRALIA i givim AUD$ 10milen ( K26.2 milen) aninit long PNG-Australia Transport Sector Support Program (TSSP) long stretim ol wok bilong sekyuriti insait long 15 sipot long PNG.

Dispela em i namba wan taim tru PNG Ports Corporation bai i mekim wanpela bikpela sekyuriti wok long helpim pot bilong PNG.

Minista bilong Stet Entaprais William Duma, Minista bilong Intenesenal Developmen na Pasifik long Australia Seneta Zed Seselja, Australia Hai Komisina Jon Philip na ol arapela bikpelal wok man na meri bilong PNG Ports i bin go long dispela bung.

Minista Duma i tok i gat bikpela nid tru long i mas i gat gutpela sekyuriti long ol si pot bilong yumi long taim olsem diman bilong tred i go antap na wol maket i wok long go orait i stap.

Ol bai i wokim sekyuriti banis na ol sola lait na ol kamera long lukim ol kar na sip i wok long i go na kam long Lae na Motukea. Minista Duma i tok banis em i wanpela samting ol pot bilong yumi long PNG i nidim tru. Em i tok amamas tru long gavman bilong Australia.

Seneta Zed Seselja bilong Australia i tok amamas long lukim ol wok long PNG na Australia i wok bung wantaim bilong helpim PNG. Em i tok,  “dispela pepa tupela Praim Minista i sainim las yia ananit long het tok ikonomik na stretejik patnasip  i bai helpim long mekim wok.” Australia infrastraksa fainensing program long Pasifik bai helpim long mekim ol infrastraksa bilong PNG.

Dispela tokaut i kamap bihain long wanpela agrimen Australia Hai Komisin wantaim Praim Minista James Marape na PNG Ports Siaman Kepas Wali i sainim long wok bung wantaim long mani mak olsem K1.1 bilen.

Samantha Solomon i raitim