JASMINE Puk i save wok olsem Flait Progrema long MAF Kastoma na Operesen Senta long Maunt Hagen. Long wan wan de, em i save wok wantaim kain kain buking rikwes insait na ausait.

Em i save bekim ol askim bilong ol kastoma, kisim ol askim bilong medivek na helpim long stretim wokabaut bilong ol sikmanmeri na pikinini i go long ol bikpela haus sik. I no long taim i go pinis, em i bin gat sans long kalap long wanpela medivek balus.  Medivek i min taim sikmanmeri na pikinini i sik nogut tru na i stap long mak bilong dai. Jasmine i serim stori bilong em.

Mi save stretim ol medivek balus tasol mi no save kalap long wanpela medivek  balus inap long Epril 30 long 1:45 long apinun taim tim i askim mi long go wantaim pailat long wanpela medivek flait. Dispela yangpela sik meri em bilong Pyarulama. Dispela ples i stap 48 notikal mail long Maunt Hagen na 21 notikal mail Is long Kompiam. Dispela meri i bin lusim tupela han bilong em bikos long domestik vailens (pait wantaim man bilong em). Long dispela taim, meri i hap indai tripela taim bikos em i lusim planti blut.

Mipela i bin kisim medivek singaut long 11:27 long moning taim. Bihain long dispela singaut, ol lain long operesen senta i toktok i go i kam na wanbel long redim wanpela balus. Long dispela taim, balus i bin redi tasol i no bin gat pailat. Mipela i paitim toktok i go i kam long rot bilong bihainim inap mipela wanbel long ringim Mathias Glass, PNG Seifti Menesa bilong MAF husat em i pailat tu. Taim mipela i ring Mathias i bin wok long redi long go long seifti miting bilong em.

“Mathias, mipela i gat medivek sikmeri bilong Pyarulama husat i nidim helpim long go long Kompiam haus sik. Yu inap long kisim em i go?” Ol lain long operesen i bin save olsem Mathias bai gat miting long dispela taim tasolol i tingting long askim em yet.

“Mi gat miting we bai kamap klostu taim, tasol em orait, bai mi askim wanpela wanwok long mekim miting. Givim mi 20 minit na mi go kisim bek bilong mi long haus,” Mathias i bekim ol lain long operesen long fon.

Bihain long 20 minit, Mathias i kamap pinis na balus i redi pinis wantaim helpim bilong ol hatwok wokmanmeri bilong MAF. Mipela i lusim Maunt Hagen long 1:45 long apinun na flai i go long Pyarulama. Dispela flait i kisim 30 minit. Weda i bin orait tasol olsem na flait bilong mipela i go gut tasol.

Taim balus i wok long go daun long ples balus, mi lukim ol pipel i ran i kam long kain kain hap na kam long hap balus bai pundaun long en. Taim mi lukim dispela, lewa bilong i bruk.

Pyarulama em wanpela rimot komyuniti long Enga Provins. Maunten i raunim dispela eria na i gat planti bikpela wara. Wanpela trenspot tasol i ken go long hap em balus.

Long taim mipela i kamap, mi lukim olgeta lain i smail long mipela. Tasol sik meri i nogat strong bilong em. Ol pipel i karim em i kam long ples balus. Ol i putim em long stretsa taim Mathias i redim ol pepawok bilong em.

Taim mi wok long sanap na lukluk stap, wanpela man i kam na toktok long mi. Em i tokim mi “MAF em laiplain bilong mipela. Mipela i nogat narapela rot bilong i go i kam. MAF tasol i save helpim mipela. Ol narapela balus i save kam tasol ol i save tok ol i stap long sata. Long satarim balus em bikpela mani tru, na mipela i nogat dispela kain mani.” Mi sanap na harim toktok bilong em na daunim na apim het bilong mi long soim olsem mi wanbel long toktok bilong em. Em i go het long toktok na em i tok “Ol lain i sanap long sait em ol i amamas tru long lukim MAF balus na ol i ran i kam.” Mi yet mi lukim na mi wanbel long toktok bilong dispela man bikos mi ken lukim ol pipel i smail na ol i luk amamas. Mi wanbel olsem dispela liklik wait, ret na blu balus em wanpela hop tasol bilong ol dispela pipel.

Wantaim helpim bilong ol lokal pipel, mipela i putim meri i go insait long balus wantaim wanpela wasmeri bilong em. Mathias i pinisim ol pepawok bilong em na mipela kalap long balus na lusim dispela ples na go long Kompiam. Sait long pailat mi sindaun na lukluk i go baksait na lukim sik meri i nogat strong bilong em. Em i luk olsem em i nogat laip. Lewa bilong mi bruk long tingim pen dispela meri i karim. Dispela meri em i wankain krismas olsem liklik sista bilong mi na mi sori tru long lukim em i pilim bikpela pen. Ples bilong dispela meri i nogat rot bilong go long haus sik, na dispela meri i bin ting em bai dai bikos em i lusim planti blut. Sapos mi bin dispela meri, bai mi gat wankain tingting olsem.

Mi kwiktaim tru rausim dispela tingting na mi traim long smail long was meri bilong sikmeri. Long meri lusim han bilong em long dispela kain ples i min olsem, famili bilong em bai nogat kaikai long tebel, sapos em i gat pikinini, ol dispela pikinini bai nogat mani bilong baim skul fi na ol arapela nid bilong ol. Long dispela kain eria, i gat wanpela rot tasol bilong kisim mani na em sabsistens faming. Mi tingim hau em i pilim taim em i harim krai bilong balus taim mipela i go kamap.

Taim mipela i wok long go long Kompiam, Mathias i tokim mi ran bilong balus bai kisim 20 minit. Tupela minit yet i stap bihain bai mipela i kamap long ples balus na bikpela ren i pundaun. Mipela i hat long lukluk i go arasait. Mi stat long poret tasol mi tingting long noken soim poret bilong mi. Ol maunten i stap 100 fit yet daunbilo na mi wok long traim long lukim wanem samting i stap fran long mipela. Mathias em ekspirens pailat, em i flaim balus isi isi tasol long taim bilong bikpela ren na mipela i pundaun long gut tasol long ples balus long Kompiam.

Insait long balus, mi apim stretsa wantaim meri na salim i go long narapela ejen na Mathias husat i wok long sanap long ren. Ol i kisim em na putim em long ambulens. Bihain long 10 minit, mipela i stap bek insait long balus na flai i go bek long Maunt Hagen.

Taim mipela i kamap, mi tok tenkyu long Mathias long mekim medivek flait. Em i bikpela samting tru long ol pipel bilong Pyarulama komyuniti. Dispela wan aua flait i sevim laip bilong dispela meri.

Mi laik kisim dispela taim long tok tenkyu long olgeta MAF famili long nesen long hatwok na komitmen bilong ol long sevim ol turangu lain we i stap long ol rimot eria bilong Papua Niugini. Spesel tenkyu i go long ol MAF pailat na MAF famili bilong ol narapela kantri husat i lusim gutpela laip bilong ol long kam sevim ol pipel bilong mi.

Jasmine Puk i raitim