LONGPELA taim pailat  bilong Air Niugini , Kepten Paul Nonggor-r i lusim wok long Jun, 30, 2021 bihain long em i wok long 45 krismas na 21,000 aua long skai.

Kepten Nonggor-r i bin stap na wok wantaim Air Niugini long stat na inap kampani i kamap bikpela na operet i go long ol narapela kantri olsem Australia, Asia na Pasifik.

Em i bin mekim laspela ran bilong em long PX 004 i kam long Brisbane na go daun long Pot Mosbi. Em i tok wok bilong em olsem pailat em i pinis nau bihain long 45 krismas.

Kepten Nonggor-r i kam long Ramdi traib bilong Koepa ples long Westen Hailans provins na em i bin stat wok olsem pailat long Fokker Friendship (F27) long 1982 taim em i gat 26 krismas.

Em i bin skul long NASA skul bilong pailat long Cessnock, New South Wales long Australia long 1975. Long dispela taim em i bin selebretim independens bilong PNG. Long 1976 em i kisim laisens bilong em long flai olsem komesel pailat na kam wok bek long PNG.

Kepten Nonggor-r i bin kamap namba tu man bilong PNG long kamap pailat bilong F27 long 1982 na long 1983 em i kamap kepten bilong F28 na dispela i mekim em kamap namba wan jet kepten.

“Dispela em bikpela win long laip na wok bilong mi long kamap namba wan jet kepten taim mi yangpela tru,” Nongorr-r i tok.

Em i tok em i bikpela salens long flaim F27 na F28 bikos dispela tupela em ol analog balus we i nidim gutpela tingting na plening skil.

Bihain long dispela Kepten Nonggor-r i stat long flaim bikpela balus Boeng inap long 19 krismas.

“Air Niugini em laip bilong mi. Makim famili bilong mi, mipela i tok tenkyu long Air Niugini famili long domestik na intenesenel ples balus, ol resevesen senta, flait operesen, het opis, enjiniaring, komesel, ketaring, trefik, kago, ol pota, ol klina na ol lain bilong mekim ti na sapotim mi long taim mi wok wantaim Air Niugini,” Kepten Nonggor-r i tok.

Carolyne Ketsimur i raitim