PAPUA Niugini Pawa Limited (PPL) woka i paul long nupela straksa nau i wok long kamap long PPL we Nesenel Ekseketiv Kaunsel i wok bung wantaim Kumul Consolidate Holdings (KCH) long kamapim.

Dispela krangi tingting i mekim long kamapim wanpela stop wok long PNG Eneji Wokas Asosiesen (PNGEWA) long petisenim PPL bod namenesmen long tok klia bihain long ol ting ol i bin agri wok wantaim.

PNGEWA i tok senis i kamap pinis bikos aninit long menesing Dairekta Flagon Bekker ol i bin abrusim 2019 Entaprais Agrimen na olgeta rot bilong wok.

PNGEWA JeneralSekreteri Santee Margis i toknamel long 8-pela mun mipela i no bin bung wantaim Mista Bekker.

“PNGEWA i bin salim sampela leta tasol em i no save kam bung wantaim mipela. Long Frade Jun 25 mipela i bung bihain long PPL Seaman Moses Maladina i tokim em long kam,” Margis i tok.

Em i tok PPL i no bin toksave long ol woka long nupela straksa bilong PPL. Olsem na ol i kirap nogut long painimaut long midia.

PNGEWA i kisim maus bilong olgeta PPL woka insait long kantri na askim PPL menesing dairekta Flagon Bekker long lusim wok na makim pat taim menesmen long larim wok painimaut i go insait long wok menesmen bilong olpela dairekta.

Dispela stop wok bai stap inap long ol i mekim klia nupela straksa long olgeta woka bilong kantri i ken save olsem em i abrusim lo na agrimen bilong 2019 EA.

Menesmen mas adresim olgeta aut standing woka isu bilong 2019 EA. Ol laikim bisnis plen bilong kampani long teknikol na oporesen plen bilong PPL long wok gen na impruvim sevis.

PPL menesing dairekta i bin bungim ol PPL woka ausait long PPL Het Opis long Hohola i tok menesmen i wok long helpim ol woka.

“Mipela luksave long hevi tasol mi laikim yupela olgeta (PNGEWA) long wok aninit long lo i stap pinis wantaim Leiba Dipatmen,” em i tok.

Joseph Dawaiiraitim