PAIAM distrik haus sik long Porgera wantaim ol komyuniti arere na ol pipel i amamas bikos ol i gat ekses long haus sik nau bihain long BSP Financial Group Limited (BSP) i givim ol medikol ikwipmen aninit long Komyuniti projek bilong en.

Ol pipel long Porgera i bin kisim taim bihain long kamap bilong COVID-19 na long taim Porgera main i bin pas. Em i bikpela salens long ol komyuniti na ol bisnis haus tasol BSP i sevim ol long taim em i inves i go long komyuniti.

BSP tim long Porgera i bin givim ol medikol ikwipmen olsem Electrocardiogram masin, Spirometer, Audiometer na Pulse Oximeter long Jun, 2021. Olgeta dispela samting inap long mani mak K30, 000.

BSP Brens Menesa long Porgera, Kips Ponga i tok haus sik i bin wok long salim ol sik lain husat i gat hai blut presa i go long ol bikpela haus sik long Wabag, Hagen na Kudjip long kisim marasin. Em i tok nau dispela pasin bai nogat moa bikos haus sik i gat fesiliti long tritim ol sikmanmeri.

“BSP i no save givim fainensal sevis tasol, nogat. Mipela i save lukluk tu long helpim long ol kain sevis olsem. Bank bai go het long sapotim ol komyuniti long Porgera bikos em wanpela benk tasol i save operet long Porgera stat long 2011,” Mista Ponga i tok.

BSP Grup Jenerel Menesa Daniel Faunt i tok Porgera i gat moa long 8,700 kastoma na BSP i investim moa long K235, 000 long Porgera stat long 2011.  Em i tok BSP i karimaut 10-pela projek. Sampela bilong ol dispela projek em konstraksen bilong ol desk long Paiam Elementri skul long 2019, instolesen bilong sola pawa long Santu Joseph Kasap Praimeri skul long 2018, instolesen bilong ol tenk wara long Sirunki Hai skul long 2013 na long 2012 BSP i stretim ol bas stop long Paiam.

Mista Hoga i tok ol medikol ikwipmen bai helpim gut tru ol sik manmeri na pikinini long ol komyuniti long Porgera na ol arapela provins we i stap klostu na kantri tu.

Carolyne Ketsimur i raitim