MOROBE Provins em wanpela provins long PNG we i gat salens long kisim sevis bikos long maunten na planti ples i stap long rimot eria na hat long kism ekses long ol sevis.

BSP i save sevim moa long 152, 000 kastoma long 5-pela brens bilong em long Morobe, em ol Lae Top Taun, Lae Maket, Lae Komesel Senta, Lae SME na Bulolo brens na tripela sab brens na 19 ejens.

Sif Ekseketiv bilong BSP Robin Fleming i tok nau bai BSP i putim nupela brens gen bilong kamapim gut na sevim gut ol pipel bilong Morobe Provins.

BSP Grup Jenerel Menesa bilong Ritel, Daniel Faunt i tok dispela nupela BSP brens bai go het long strongim rilesensip bilong ol bikpela komyuniti long ol rimot eria.

“Mipela bai go het long bringim ol besik benking sevis olsem opim akaun, rejisterim ol kastoma long mobail benking na kamapim ol kes ejens long olgeta hap i go inap long Wau-Bulolo long go hetim ol benking sevis long ol rurel eria long Morobe provins,” Mista  Faunt i tok.

Em i tok moa olsem BSP bai mekim ol komyuniti projek tu bilong impruvim laip bilong ol kastoma bilong en.

Carolyne Ketsimur i raitim