Noella Wavu husat i wok long go het wantaim skul bilong Human Developmen Institute (HDI) na Personal Viability Business Scheme (PVBS) long Tinputz distrik i helpim ol level 3 patisipen long mekim namba wan bikpela maket bilong ol.

Astingting bilong PVBS em long skulim ol grasrut pipel long rot bilong mekim mani bilong sapotim ol famili long baim skul fi bilong ol pikinini, baim kaikai bilong famili, stretim nid bilong ol pikinini na moa yet mekim mani insait yet long rijon na kontribiut i go long ikonomi bilong Bogenvil.

Ol patisipen na ol lain i greduet long Level 3 i bin mekim namba wan wokabaut bilong ol i go long bikpela maket long Buka taun  na bung wantaim ol arapela SME grup long hap na ol salim ol gaden kaikai bilong ol.

Meri i bin makim maus bilong ol meri long Not Bogenvil long ABG, Francisca Semoso i bin welkamim ol lain bilong Tinputz husat i greduet long Level 3 long Buka maket wantaim helpim bilong Daisy Hotsia.