DELIGESEN bilong Dipatmen bilong National Planning na Monitoring (DNPM) i bin mekim 5-pela de raun long Sepik Rijon long lukluk raun long ol projek bilong EU-STREIT.

Long dispela raun, deligesen i bin bung wantaim tim bilong EU-STREIT, Provinsal Edministresen, ol sevis provaida na ol lain i benefit stret long projek na toktok long ol hevi i kamap long eria ol projek i ran long en.

Tim lida na Asisten Sekreteri bilong DNPM, Jacob Areman, i bin amamas long lukim ol wok bilong EU-STREIT Program na i tok em i gutpela long harim tingting bilong ol fama na ol lain i kisim helpim long ol dispela projek long hau program i wok long sapotim ol.

Em i tok moa olsem wokbung wantaim bilong ol komyuniti em i impoten long program i mas kamap gut. Em i tok ol fama em ol impoten lain na ol i nidim moa taim wantaim ol lain i sapotim ol.

Em i tok amamas long lukim projek bilong kakao na vanila veliu sen na ol infrastraksa divelopmen long olgeta kona bilong Sepik rijon.

Wantaim  sapot bilong EU STREIT PNG tim, misin bilong DNPM tim i bin karamapim planti hap we program i save wok long en. Ol lukluk raun long nupela fiseris opis na Ais plent long Vanimo, Wutung Maket Fasiliti long boda bilong Indonesia, Vanila fam long Waromo ples long BWO LLG, Passi-Krisa-Osol rot impruvmen, PDAL ekstensen sevis senta long Pasi, Rot impruvmen long Yawasoro Niengwanje, Wewak Rurel LLG trening, neseri na badwud gaden sait, Hawain neseri na risos senta, Wilmom Agro Faming Bisnis Grup na Wewak Rurel LLG kakao na vanila trening, neseri na badwud gaden.

Delegesen i amamas long lukim wok bilong EU STREIT i sapotim gut ol lokal fama long Sepik rijon na ol i tok dispela program em gutpela long gavman bilong PNG.