OL 12-pela viles husat i papagraun bilong Ok Tedi gol na kopa main long Westen provins i mekim histori stret taim ol i kisim K19.4 milien winmani bilong ol.

Mineral Risoses Star Maunten Limited (MRSM) bod ov dairekta i givim K19.4 milien i go long 12-pela viles long Ok Tedi eria bihain long bikpela Ok Tedi Maining Limited (OTML) i win wokim profit long yia 2020.

Dispela winmani o dividen i kamaut long nain pesen  sea o invesmen ol dispela papagraun i gat long OTML aninit long kampani bilong ol papagraun em long Mineral Risoses Start Maunten Limited we trasti bilong ol em  Mineral Risoses Divelopmen Kampani (MRDC).

Aninit long rivais benefit sering agrimen (RBSA) disisen bilong Me 22, 2021 ol lida bilong ol papagraun viles wantaim MRSML i wanbel long serim dispela K19.4 milien winmani long 12-pela viles husat i papagraun bilong Ok Tedi maining.

Ol dispela viles em 6-pela bilong ol i stap long mein eria em Aremkit, Kavorabip, Finalbin, Bultem, Wangbin na Migalsim.

Foapela viles insait long lis-fo-maining prosos eria em Kumkit, Ok Tedi Taun, Ankit na Noisikwi. Tupela arapela viles klostu em Korkit na Kawengtikin.

Dispela dividen peimen olsem kes-mani i go long ol Ok Tedi papagraun em namba wan taim tru  long histori bilong maining indastri sekta long Papua Niugini na no gat arapela lain i bin mekim olsem bipo.

Sif Opereting Opisa bilong Mineral Risoses Divelopmen Kampani, John Tuaim husat i bin stap long dispel seremoni long Migalsim viles i tok amamas long ol MRSM bod long mekim dispela presentesen long pablik we ol pipel na ol arapela stekholda i lukim.

Tuaim i askim ol dispela viles husat i kisim dispela mani long kamapim ol gutpela projek we bai i lukautim laip bilong ol pipel na ol pikinini bilong nau na bihain taim.

Em i tok minerals long Ok Tedi bai pinis bihain long sampela yia tasol ol invesmen ol papagraun i mekim bai i stap long helpim ol long bihain taim long strongim sindaun na laip bilong ol.

Ol pipel bilong ples na ol lain i makim ol stekholda, Gavana bilong Westen provins, Taboi Awi Yoto na ol opisa i makim OTML na MRDC i bin stap long Migalsim viles long dispela seremoni.

Tuaim i makim maus bilong MRDC na em i tokim ol papagraun olsem MRDC bai go het yet long wok wantaim MRSML long helpim long wok bisnis na kamapim gutpela kwaliti laip bilong ol papagraun bilong Ok Tedi eria wantaim invesmen bilong ol long MRSML.

James G. Kila i raitim