INTERNAL Revenue Commission (IRC) wantaim Is Nu Briten Provinsal Gavman (ENBPG) i bin sainim MoU bilong wokbung wantaim long taim bilong kisim takis insait long provins.

Komisina Jenerel bilong IRC, Sam Koim i bin go sainim dispela MoU long Kokopo wantaim Provinsal Edministreta, Wilson Matava.

Is Nu Briten i kamap namba tri provins long kisim bikpela takis, tasol Mista Matava na Mista Koim i tok dispela i ken kamap gut na impruv moa yet.

Dispela patnasip bai helpim tupela pati long serim infomesen i go i kam na long wankain taim Is Nu Briten i sapotim IRC long impruvim takis long provins.

Mista Matava i tok tenkyu long Mista Koim long mekim komitmen na karimaut wok bilong dispela patnasip kwiktaim. Em i tok em i gat bikpela bilip olsem Is Nu Briten i ken groim intenel revenyu bilong em yet.

Komisina Koim i tok amamas long ENBPG long wokbung wantaim IRC. Em i tok ENBPG i ken kisim atonomi, tasol dispela em bai wanpela driman tasol sapos mani bilong provins i no strong.

“Mipela i stap long helpim provins long apim GST. Wantaim dispela mipela i ken givim 60 pesen bilong takis mipela kisim i go bek long yupela. Dispela bai helpim long groim ikonomi bilong provins,” Mista Koim i tok.

Moa yet Mista Koim i givim gutpela sain namel long tupela pati long groim ol liklik bisnis o SME long provins wantaim Small Business Tax rejim (SBT), nupela takis bilong ol liklik bisnis we IRC i lonsim long tripela wik i go pinis.

Mista Koim i tokaut tu olsem Is Nu Briten bai kamap namba tu provinsal gavman long joinim GST Seksen 65A. Namba wan provinsal gavman husat i join pinis em Atonomus Bogenvil Gavman.

Carolyne Ketsimur i raitim