VERA RAGA em i nupela ekseketiv opisa bilong Association of Superannuation Funds of Papua New Guinea (ASFPNG). 

Long wankain taim ASFPNG i makim tu ol eksektiv bilong en long bung bilong ol long Jun 4.

Ian Tarutia bilong Nasfund i holim yet posisen bilong em olsem Presiden na Vere Arava bilong Nambawan Super Limited (NSL) i kisim posisen bilong Vais Presiden. Charlie Gilichibi long Comrade Trustee Services Limited (CTSL) i kamap Tresera na Rebecca Moyokeda long Aon Master Trust (AON) i kisim posisen bilong seketeri.

Posisen bilong tupela odineri memba em i stap nating yet na bai ol i makim ol long narapela miting. ASFPNG bai mekim olgeta stetuteri wok bilong en wantaim odit bilong fainensal stetmen bilong yia 2020.

ASFPNG i bin kamap long yia 2002, na wanpela wok bilong en em long makim olgeta memba bilong en long ol riviu we i kamap long ol polisi na lo bilong suparenuesen indastri.

ASFPNG em i impoten long Suparenuesen Ekt 2000 na tu i save stap long ol riviu. Em i redi nau long wokbung wantaim long riviu bilong Suparenuesen Ekt 2000 na Life Insurance Ekt 2000. Bank bilong Papua Niugini i bin kamapim dispela tupela Ekt na Dipatmen bilong Treseri i bin tokorait long en long 19 Ogas, 2020.

Dispela riviu em ki bilong Fainensal Sekta Divelopmen Stretaji (FSDS) bilong 2018-2030.

ASFPNG wantaim ol memba bilong em bai wokbung wantaim long suparenuesen riviu na bai bung na toktok long sabmisen bilong Superannuation and Life Insurance Review Committee (SLIRC).

Nau ASFPNG i wet long SLIRC long givim dispela diskasen pepa long en.