MEMBA bilong Finschaffen, na Nesenel Plening Minista, Renbo Paita i tok tenkyu na amamas long Gavman bilong Australia, long givim K67 milien sapot long apgredim mini grid pawa sistem.

Mista Paita i tok edministresen bilong em long distrik level bai mekim ol wok long lukim olsem pawa i mas go olgeta long eria bilong Finschaffen.

Mista Paita i tok dipatmen bilong em bai sapotim rurel ilektrifikesen program aninit long Australia Patnasip Program.

Hai Komisina bilong Australia long PNG, Jonathan Philp i tok, “Pawa saplai em bikpela hevi na i gutpela distrik mas gat pawa saplai bilong em yet. Dispela bai sapotim na helpim ol pipel bilong Finschaffen, long ranim gut ol bisinis, haus, eduksen, helt, seminari na ol arapela lain i save yusim pawa,” Mista Philp i tok.

Renbo Paita i makim maus bilong ilektoret bilong en na i tok amamas long gavman bilong Australia na patnasip program bilong en.