PAWA kampani bilong gavman, PNG Power Limited (PPL) i wok long painim wei bilong givim pawa long nupela Nesenel Eneji Atoriti (NEA).

Flagon Bekker husat i bin mekim wok bilong Menesing Dairekta bilong PPL i bin mekim dispela toktok long wanpela patnasip woksop bilong PPL long Pot Mosbi long 23 Jun, we ol eneji opereta long olgeta hap bilong kantri i bin kamap.

Mista Bekker i risain long wok bilong en las wik na i lusim PNG na go bek long ples bilong em. Em i bin holim wok bilong menesing dairekta inap 9-pela mun.

Palamen i bin tokorait long NEA Bil 2020 long senisim PPL i go long NEA long mekim isi long baim na saplaim pawa gut long ol kastoma.

Bekker i tokim ol stekholda na patna husat i bin stap long dispela woksop olsem PPL i isi tumas long salim pawa long NEA tasol ol i mas stretim olgeta samting pastaim long ol i givim i go long NEA.

“Nau bai yumi wokabaut long nupela rot na dispela i soim olsem pasin bilong wok bilong NEA i no klia. Dispela patnasip wok bung em long inkrisim awenes olsem na olgeta i save long lo na wok bilong NEA i senis.

“Wokbung wantaim i mas kamap namel long yumi olgeta long helpim na bringim sevis. Mipela i laik impruvim sevis na mekim isi long ol pipel long baim ilektrisiti insait long kantri,” Bekker i tok.

Em i tok bikpela wari na tingting em long wanem samting bai kamap long taim bilong givim wok tasol em i olsem nupela gem na nupela pilaia i traim long luksave long em.

PPL i tok sori long ol i no givim gut pawa saplai long kantri maski i gat inap eneji long saplaim long ol taun na siti.

Tasol, Bekker i tok long siti olsem Pot Mosbi i gat planti iligel koneksen na i save distebim pawa long ran gut.

“Ol waia na pos i olpela na i no gat strong long bringim pawa i go long ol kastoma,” em i tok.

Joseph Dawai i raitim