SIAMAN bilong Paradise Company Limited, Anthony Smare i tokaut olsem Sif Ekseketiv Opisa bilong Paradise Grup, James Rice bai lusim wok bilong em long pinis bilong mun Julai 2021. Astingting bilong dispela em bikos long sampela hevi long famili bilong em.

“Mista Rice i tokim bod olsem em i stap longwe long famili bilong em husat i stap long US i kamapim hevi bilong ol long trevol i go i kam long PNG bikos long ol ristriksen bilong COVID-19.  James i stap wantaim dispela hevi long 18 mun olgeta wantaim sapot bilong bod na kampani. Em i no gat narapela sans olsem na em i lusim wok na go bek long famili bilong em na wok olsem konsalten long Paradise long America,” Mista Smare i tok.

Mista Smare i tok James Rice i bin kamap CEO bilong Paradise long 2019. Em i mekim gutpela wok long kamapim strongpela lidasip tim long kampani, divelopim talen bilong ol nesenel wok lain, na lukautim maket bilong Paradise Food long taim bilong COVID-19.

“Mi bai lusim posisen bilong mi olsem CEO na go bek long US. COVID-19 i mekim mi stap longwe long famili bilong mi long 18 mun. Mi laikim tumas PNG, ol pipel long PNG i kamap gutpela poro bilong mi. Mi sori long lusim PNG, tasol mi bai wok yet wantaim Paradise long US,” Mista Rice i tok.

“Kampani bai lukluk long painim nupela CEO long 6 i go long 8 wik taim,” Mista Smare i tok.

Carolyne Ketsimur i raitim