“OL Small and Medium Enterprises (SME) i gat bikpela wok long mekim long kontribut i go long ikonomi bilong kantri,”

 Praim Minista James Marape i bin mekim dispela tok long taim em i  givim toktok long pasim SME wik we i bin kamap long APEC haus long Pot Mosbi.

Em i tok amamas long ol lokal SME long holim PNG SME wik we i bungim olgeta SME lain wantaim.

“Tenkyu ol SME long wanem samting yupela i mekim long dispela wik. Planti kantri i save kamap strong bikos ol SME i sapotim ol,” Mista Marape i tok.

Em i tok Indonesia em wanpela bilong ol dispela kantri wantaim moa long 50 milien SME.

Long wankain taim tu  em i tokim ol SME lain olsem egrikalsa em wanpela rot ol SME i mas lukluk long strongim. Em i tok egrikalsa i ken kamapim planti domestik nid na long wankain taim salim i go long ol narapela kantri.

“PNG em i stap klostu long ol Pasifik kantri, Asia na Indonesia we i gat populesen i sanap olsem 260 milien,”

Wantaim dispela, PNG i ken groim ikonomi bilong em taim em i salim ol lokal prodak i go long ol dispela kantri.