MEMBA bilong Kikori, Soroi Marepo i helpim ol lain long ples long bisnis bilong salim pis.

Soroi Marepo i givim K439,500 long ol pipel bilong Kikori diistrik  long baim ol net bilong kisim pis, na 15 hos pawa moto.

Bihain long Gulf Papua Fisheris i bagarap na Prawn Fisheries wantaim ol Korea na ol narapela komesel wok i bin stop, i no bin i gat wanpela komesel wok bilong kisim pis i bin kamap long planti yia.

Galp Provins i no save kisim wanpela benefit long ol wok bilong kisim pis ol kamapani i save mekim. Ol kampani i no save bihainim stret tok bilong ol long kisim liklik kindam na pis long wara.

Bisnis bilong kuka na pis  i kamap bikpela insait long Kikori Distrik na planti manmeri  long ples i wok bung wantaim long Baimuru, Is Kikori na Wes Kikori LLG.

Wok bilong painim pis long 5-pela yia i mekim laip bilong ol manmeri long dispela ol ples long Kikori i kamap gutpela.

Kikori Distrik Development Authority (KDDA) i kam insait long baim ol net na moto bilong ol lain husat i no save wok long kisim pis tasol ol i gat bikpela laik long wokim bisnis.

Ol i givim K247,500 long Solwara PNG Limited long baim 1506.5 mono net na K192,000 ol i givim long Sports Fishing PNG Limited long baim ol 2515 hos pawa autbot moto.

Memba bilong Kikori, Mista Marepo i tok amamas long Solwara PNG na Sports Fishing Limited long helpim ol lain long ples. Dispela wok i stap long 5-pela yia divelopmen plen bilong Kikori Distrik.

Em i tok Kikori i wanpela hap i gat planti wara na hat tru long givim sevis long ol pipel, tasol i gat ol gutpela samting olsem pis, oil na gas i stap long dispela hap. Kikori distrik i gat 80 pesen gas bilong PNG ol i bin painim long hap.

Soroi Marepo i tok ol lain bilong Kikori i no save stap klostu, ol i save stap longwe long ol wan wan hap bilong ol na i no isi long ol wokbung wantaim bilong mekim mani. Ol dispela samting olsem net na autbot moto bai helpim ol long mekim wok bilong kisim mani.

Soroi Marepo i tok ol net samting em i no inap long givim olgeta lain tasol em bai helpim ol komyuniti  long mekim wok bisnis.

Planti kampani i wok long baim ol pis, kuka na kindam bilong Kikori. KDDA bod i gat tingting long baim wanpela solar frisa long putim ol pis long ol hap we i no gat ilektrik pawa.