‘KAPA SenisimMorota’ program long Usino-Bundi distrik long Madang bai go het yet bihain long Usino Kapa Faktori i kisim nupela saplai ain-ril kapa rol i kam long ovasis.

Long las wik ol bikpela trak i bringim ol rol ain-ril kapa long sip bris long Lae, i go long Usino Kapa Faktori we ol wok lain bai katim kapa na givim long ol wan wan famili long distrik.

Aninit long dispela program, wan wan famili long tripela lokal level gavman long distrik, Usino, Bundi na Gama bai kisim ol 24 12 fit kapa long putim long ruf bilong haus. Ol timba bilong wokim haus em Usino-Bundi Distrik Divelopmen Atoriti (DDA) i baim na redim ol Lucas Wokabaut Somil pinis long ol wod eria i yusim na katim diwai bilong ol pipel.

Minista bilong Edukesen na Memba bilong Usino-Bundi, Jimmy Uguro i tok long las yia dispela kapa roll-aut program i bin stap malolo bihain long sik Covid-19 i bin kamap na i givim hevi long muvmen bilong ol transpot olsem ovasis sip long bringim saplai i kam long PNG. Tasol nau dispela i orait na wok bilong‘KapaSenisimMorota’ program mas go yet.

Dispela em wanpela bikpela impek projek bilong helpim ol rural pipel bilong Usino-Bundi na Gama long senisim sindaun bilong ol long ples.

Uguro i laik senisim sindaun na laip stail bilong ol pipel bilong em na i putim mani wantaim helpim bilong gavman long mekim projek ya i go het yet.

I no longtaim i go pinis, Mista Uguro wantaim ol lain long Usino-Bundi DDA i bin stap long Walium long givimaut 11-pela wokabaut somil masin. Dispela masin bai stap long sentral ples long ol wod na katim diwai bilong ol lain manmeri bilong ples long wokim haus.

Mista Uguro wantaim Usino-Bundi DDA i wok long promotim kakao prodaksen tu long distrik we ol famili husat i gat haus kapa i mas gat kakao gaden tu i stap klostu long haus bilong ol. Mista Uguro wantaim Usino-Bundi DDA i baim motobaik na i givim long tupela viles didiman bilong Usino. Ol tupela man ya bai raun na wokim kakao rihebilitesen na wokim ol kakao neseri long givim ol kakao sidlings long ol pipel long distrik i planim arere long haus kapa ol i wokim long ples.