OL pipel husat i gat bisnis bilong ranim ol gest haus na kempsait long hap bilong Kokoda Track i kisim taim nau bikos COVID-19 i bin stopim ol turis long go raun long dispela hap. Tasol ol i yusim dispela taim long pinisim bisnis menesmen trening long strongim save bilong ol long fainensel literesi na long pasin bilong lukautim haus slip bilong ol visita.

Ol liklik na namel—sais bisnis (SMEs) i save kamapim bikpela mani long kantri, tasol planti bilong ol i bungim hevi long ranim bisnis na planti bilong ol liklik bisnis i save pundaun.

Dispela Start Your Business – Micro Enterprises trening i bin kamap long Sogeri, Buna na Efogi bilong helpim ol komyuniti i stap arere long Kokoda Track long Sentral na Noten Provins.

Moa long 70 papa bilong ol kempsait na ol gesthaus i bin go stap long dispel wan wik trening program long lainim bisnis strateji bilong ol SMEs na strongim ikonomik ektiviti long dispela rijon.

Papua New Guinea–Australia Partnership, na Kokoda Initiative i bin go pas long dispel trening na ol trena i bin kam long Small to Medium Enterprises Corporation (SMEC). Dispela em I wanpela han bilong gavman husat i mekim wok long divelopim na promotim ol SME.

Ol lain i bin kisim trening long bisnis na maketing plen, wei bilong kisim na spendim mani na pasin bilong lukautim ol kastoma.

SMEC trena Edward Kepa i tok long taim ol i sapotim wan wan papa bilong bisnis bai ol i sapotim tu olgeta lain long komyuniti.

“Dispela trening bai promotim ol liklik bisnis na strongim wok bilong ol,” em i tok.

“Dispela bai kamapim gut sindaun bilong ol pipel na apim mak bilong turis bisni long kantri.”

Ol i bin kamapim Campsite and Guesthouse Owners Association long 2019, long helpim ol pipel husat i stap long dispela eria bilong Kokoda Track.