MEMBA bilong Huon Gulf long Morobe Provins, Ross Symour, i baim wanpela nupela ambulens bilong karimaut wok bilong daunim COVID-19 long Huon Galp bihain long Wampar lokal level gavman i rekotim 7-pela COVID-19 keis.

Dispela ambulens i gat olgeta ikwipmen olsem, win, wil sia, mask na ol arapela medikol ikwipmen tu. Dispela ambulens tu bai helpim Wampar helt senta long karimaut wok bilong en long Wampar.

Ross Symour i baim dispela ambulens long K225, 000 mani mak wantaim ol ikwipmen i stap insait, long wainkain taim em i givim K50,000 long karim aut wok bilong Covid 19 long distrik bilong en.

“Faivpela wik i go pinis mi bin kisim test bilong COVID-19 na risal i soim olsem mi gat COVID-19. Olsem na mi olsem lida bilong Huon Galp, mi ken tok stret olsem long kain keis bilong COVID-19, em bai yu dai or bai yu stap Laip,” Mista Symour i tok.

“COVID-19 em i no pilai sik, em inap bagarapim laip bilong yumi, na sapos yumi bihanim lo bilong lukautim yumi yet gut ating bai yumi inap stap gut,” Mista Symour i tok.

  Mista Symour i gat tingting tu long baim full ikwipmen ambulens long ran long solwara na karim aut wok bilong COVID-19 long ol nambis eria tu.

Paulus Tali i raitim