MEMBA bilong Gumine, Nick Kuman wantaim Gumine Distrik Divelopmen Atoriti (GDDA) i baim tripela nupela embulens bilong helpim ol sikman na meri long distrik bilong em.

Distrik Helt Opisa, Roger Kopan i bin kisim namba wan kar las wik bilong Jun. Ol tupela arapela embulens bai kamap long dispela mun, Julai.

Mista  Kuman i tok ol tripela lokal level gavman bilong Gumine, Digine na Kumai-Bomai bai yusim ol dispela tripela kar olsem embulens bilong helpim ol pipel.

Em i tok bai ol i yusim ol dispela Toyota 12 sita lenkrusa long karim ol sikman na ol mama i laik karim bebi i go long wanem helt senta i stap klostu long ol. Bai ol i yusim ol dispela kar tu long karim bodi bilong man i dai.

Mista Kuman i tok ol pipel bilong Gumine i nidim transpot long karim ol i go long haus sik na em i tokim  Roger Kopan long lukautim na yusim gut dispela propeti bilong distrik.

Long wankain taim tu, Mista Kuman i givim wanpela Toyota Trooper kar long Mobile Squad 08 long Kerowagi.

Ennio Kuble - Wright Media