MOUNT WIKAUMA i krai olsem em i wari tasol dispela i olsem blesing tu long taim mipela i waswas long ren na kamap long Moremaule bihain long mipela i bin draiv tupela aua i kam long Kundiawa, biktaun bilong Simbu.

Mi go bek long ples bilong mi long Mul viles long Gumine distrik bihain long mi bin go stap 4-pela yia long Pot Mosbi.  Dispela i bin wanpela gupela raun tasol mi sem na wari tu long lukim rot i bagarap.

Gumine kolta rot em ol i kolim Nilkare Highway na Asian Development Bank (ADB) i bin putim mani long wokim dispela rot long 2002.

Dispela nesenel rot i sevim ol pipel bilong Gumine na SaltNomane/Karamui distrik long Simbu provins. Tasol sori tru dispela rot i bagarap nau bihain long planti yia.

Dispela rot em i save helpim ol Bomai pipel bilong Saut Simbu.

Works Dipatmen na Simbu Provinsal Gavman i no mekim wok bilong ol long lukautim dispela impoten rot long las 19 yia.

Gavman i wokim ol rot long olgeta hap bilong Papua Niugini tasol bihain ol rot i save bagarap.

Rot em i wanpela impoten pablik sevis bilong helpim ol pipel bilong yumi husat i stap long ol rurel ples.

Planti taim ol pipel i save sutim tok long ol politkal lida sapos mani i sot o wok i no ran gut. Tasol ol pablik sevan long Kondom Agaundo bilding tu i mas pilim hat bilong paia. Ol i wok long slip yet na kisim mani nating long Waigani. Tasol mobeta ol i mas risain na larim ol nupela blut i kisim ples na kamapim sampela gutpela wok long Simbu. 

Long taim mipela i ran tripela aua i go long Gumine stesin, mipela i sindaun long baksait bilong wanpela lenkrusa.

Ol PMV husat i ran long dispela rot tu i pulap tru long ol pasindia na i luk olsem ol i brukim lo bilong trafik. Draiva i abrusim ol naispela maunten, ol fres wara, na naispela ol ples. Ol i no wari long hamas pasindia ol i karim bikos ol dispela lain i laik go bek long ples bilong ol.

Planti ol dispela PMV i lapun tasol ol i save gut long rot bilong Saut Simbu tasol ol arapela draiva bai i pret long draiv long dispela rot.

Paul Maima i raitim 

Planti eksiden i save kamap tasol ol draiva bilong dispela rot em ol saveman ya.

Member bilong Gumine Nick Kuman i tokaut olsem DDA bilong en bai givim K500,000 long stretim rot long Gumine stesin i go long Mul na Warasua boda.

"Kontrak i stap long tenda nau long wanpela gutpela lokal kampani long stretim dispela rot.”  

Lida bilong ol Koblaku wanpisin i tok tenkyu long Mista Kuman na DDA bilong em long givim mani bilong stretim dispela rot. Em i tok husat kampani i kisim dispela kontrak i mas mekim gut wok inap long mak bilong mani ol i givim.