KAMAPIM em i wanpela vanila prodaksen kampani long PNG. Ol i wok bung wantaim PNG EXPO 2020 tim long promotim PNG vanila long Dubai Wol Eksposisen long mun Oktoba long dispela yia.

Kamapim i wok wantaim ol papagraun long Madang na Morobe Provins. Ol dispela lain i save wokim nambawan kwaliti vanila bin na ol i stat pinis long salim i go long EU maket.

Menesing Dairekta bilong Kamapim kampani, Dokta Nancy Irwin i bin bung wantaim PNG Komisina Jenerel bilong EXPO 2020, Embaseda Joshua Kalinoe, na Deputi bilong em, Jacintha Warakai-Manua long Pot Mosbi las wik long stretim dispela wokabaut.

Dokta Irwin i tok nem bilong kampani, “Kamapim” i min divelopmen na impruvmen. Kampani i lukluk long mekim namba wan kwaliti vanila bin bilong salim long intenesenel maket.