LAS wik Minista  bilong Edukesen na Memba bilong Usino- Bundi, Jimmy Uguro i bin stap long distrik hetkwata long Walium we em i givim 11-pela wokabaut somil masin long helpim ol pipel long katim diwai.

Dispela somil i bihainim pastaim plen bilong em long givim aut kapa long olgeta famili long Usino-Bundi distrik.

Em i tok ol wokabaut somil bai helpim ol pipel long ples husat i kisim kappa. Bai ol i yusim dispela somil long katim diwai long graun bilong ol yet na stretim na wokim gutpela haus bilong ol.

Mista Uguro i tok tu olsem distrik bai i go het long promotim egrikalsa na em i opim nupela kakao baiya depo. Dispela kakao baiya depo i stap long Usino stesin na i wok long baim kakao long ol fama long ples.

Planti fama long Usino-Bundi distrik na sampela long Midel-Ramu i save go olsem long Banu bot-stop na bringim kakao bilong ol i go salim long Usino stesin.

Mista Uguro i tokaut tu long givim prais sabsidi sapot long ol fama long distrik bilong em.

Long dispela seremoni long Walium, Mista Uguro i givim ki bilong tupela nupela motobaik long tupela egrikalsa fil stensin opisa. Bai ol i yusim ol motobaik long mekim wok bilong ol. Dispela ol wok bai helpim long kamapim kakao neseri na givimaut sidling long ol fama long ples long planim ol graun bilong ol.

Tupela  lokal didiman bilong Begesin, Samuel Masawa na Amos Ligaiba i go pas olsem fama trena long promotim rolaut bilong kakao rihabilitesen na ekstensen wok long Usino-Bundi Gama distri.

Mistal Masawai i givim bikpela tok tenkyu i go long Mista Uguro long luksave em i givim long kamapim moa kakao long distrik.

Ol tupela fama trena em ol strongpela man long toktok na bungim ol pipel. Usino-Bundi DDA wantaim Memba bilong Usino-Bundi na Minista bilong Edukesen, i luksave long wok ol i save wokim long kakao rihabilitesen na didiman ekstensen wok long distrik.

Amos Ligai em wanpela man husat i bin skul long Martin Luther Seminari long Lae na leksera bilong em pastaim em Lessley Bents, husat nau em Edvataising Menesa bilong Wantok Niuspepa.

James G. Kila I raitim