BSP Pay em rot bilong baim ol samting we kastoma i ken yusim onlain peimen. Yu no nidim BSP kat o mani long paus.

BSP brens long Waigani i bin holim bung bilong ol SME las wik bilong skulim ol long yusim BSP Pay.

Long dispela bung, 25 SME i bin kamap na BSP tim i bin helpim ol wantaim ol infomesen ol i nidim long save long gutpela bilong BSP Pay na rot bilong rejista na yusim.

Wanpela BSP SME kastoma, mama bilong Tapioca Delight, Ginia Sialis i serim ekspirens bilong em olsem BSP Pay na em i tok “Mipela i save wok hat long givim isi ekses long ol kastoma bilong mipela. Nau mipela amamas long BSP Pay bikos em i mekim isi rot bilong salim na baim ol samting. Wantaim dispela BSP Pay, mani i ran gut insait long bisnis, na i helpim bisnis long gro.”

BSP Grup Ritel Jenerel Menesa, Daniel Faunt i tok “Bikos long COVID-19, planti SME bisnis i bin pundaun, olsem na BSP i kamap wantaim dijital strateji long strongim gen ol bisnis long wok gut insait long lokal na global maket.”

Em i tok BSP dijital benking em rot we bai groim ol bisnis na tu kisim moa kastoma i kam long olgeta hap bilong wol wantaim BSP Intenet Peimen.

“BSP tim i bin helpim mi long rejista long BSP Pay. Taim EFTPos masin bilong mi i bin bagarap, na mi no bin gat inap senis mani long givim ol kastoma, Mobail benking i bin helpim mi gut. Ol kastoma i mekim peimen i go long SME akaun bilong mi. Dispela i mekim isi tru na mi no gat wari long painim senis mani bilong ol kastoma.”

Em i tok em i askim ol arapela SME bisnis long rejista long onlain peimen bilong mekim isi long ol na ol kastoma bilong ol.

Carolyne Ketsimur i raitim