MINISTA bilong  Edukesen, Jimmy Uguro i bin bisi tru las wik long wok long kakao gaden wantaim ol fama long distrik bilong em long wod 32 long Usino Lokal Level Gavman.

Minista Uguro i bin planim ol nupela kakao klon em ol didiman long distrik i badim o wokim kamap gut na dispela ol kakao sidling em ol bai no ken bringim sik bilong kakao ol i kolim kakao pod bora (CPB).

Uguro i bin wok wantaim ol fama long wod 32 bilong helpim ol long wanpela fil ekstensen opisa na treina, Amos Ligai wantaim Presiden bilong Usino LLG, Peiwa Aimai.

Dispela kakao projek em Uguro i bin go wok wantaim ol fama long planim em i kam aninit long  Usino-Bundi distrik divelopmen atoriti (DDA) i bin kamapim aninit long prais sabsidi skim program bilong en na mani sapot bilong nesenel gavman.

MP Uguro i tok klia olsem bikpela as tingting bilong Marape gavman em long lukim olsem ol pipel long ples i ken kamap ikonomik independen na i gat mani long poket bilong ol, taim ol i holim graun na wok hat na kamapim samting.

James G. Kila i raitim