JASTIS Minista Bryan Kramer i tok planti ‘kaikai man’ long Waigani   insait long  dipatmen na wokman bilong gavman pastaim i yusim Pasifik Marin Indastrial Jon (PMIZ) long paulim bikpela mani long Vidar long Madang provins.

I no gat wanpela wok i kamap

Mista Kramer i mekim dispela toktok long taim em i bungim Tresera Ian Ling-Stuckey na Minista bilong Fiseris na Marin Risos, Dokta Lino Tom. Ol i bin go long Madang las wik long lukim  wanem ol bagarap nau i stap long PMIZ eria long Vidar.

Tude bus i karamapim dispela ples stat long mausrot bilong projek i go olgeta long eria we plen i stap long wokim ovasis sip bris na ol opis na ol arapela haus bilong PMIZ projek.

Tresera Ling-Stuckey i tok plen bilong kamapim PMIZ i bin kirap long 2004, na namba wan lain husat i kamap wantaim dispela tingting em Nesenel Fiseris Atoriti.

Long 2015 gavman bilong Peter O’Neill i bin mekim bikpela seremoni long statim wok long PMIZ projek.

O’Neill gavman long dispela taim i tokaut olsem PMIZ bai bringim K7 bilien na K14 bilien i kam long paus bilong PNG long wanpela yia.

Tasol dispela olgeta toktok i go wara nating.

Dispela lukluk raun bilong Tresera Ling-Stuckey, Fiseris Minista, Dokta Lino Tom wantaim Kramer na Menesing Dairekta bilong Nesenel Fiseris Atoriti (NFA)  em wanpela wok bilong gavman tude long rivuim Midium Tem Revenu Strateji bilong yia 2023 i go 2027.

Dispela stadi em long painimaut ol rot bilong kisim mani long kirapim bek PMIZ.

Moa long dispela, ol minista i laik luksave long wanem ol wok i no bin kamap long PMIZ na long painimaut we moa long K300 milien i bin lus nating.

Wanem ol paul pasin i kamap na ol lain pastaim i kisim graun long kamapim PMIZ projek.

Kramer i sanap strong olsem gavman long pastaim i bin rausim na yusim sampela mani na tu PNG gavman i putim sampela helpim mani long PMIZ we mak i sanap moa long K50 milien, tasol no gat wok i kamap.

Dispela projek i bin stap aninit long Dipatmen ov Komes na Tred, tasol long dispela mun tasol Nesenel Ekseketiv Kaunsil i muvim bek i go long han bilong Nesenel Fiseris Atoriti.

Minista bilong Fiseris, Dokta Lino Tom  i tokaut tu olsem namba wan lain long kam wantaim tingting bilong PMIZ em NFA (Nesenel Fiseris Atoriti) tasol ol gavman lain long pastaim i givim i go long ol arapela dipatmen na ol i wokim kain kain i go i go nau em bai go bek long han bilong NFA.                                                                                        

Tresera Ling-Stuckey i tok gavman bilong James Marape i laikim dispela projek long kirap gen tasol em i mas bihainim transparensi, ples-klia pasin na akauntabiliti, gutpela rot long yusim mani.

James G. Kila i raitim