OLGETA wok bilong wokim nupela maket long Goroka em i bin pinis long 2019.

I kam inap nau, ol pipel bilong Goroka, Isten Hailans na PNG i no yusim yet dispela maket.

Dispela pasin bilong stopim dispela maket i kam inap tupela yia nau i mekim sampela lokal lida i wari. Ol i no amamas bikos longpela taim tumas ol i lainim ol kaikai na salim long maket long Peace Pak. Ol i save kisim bikpela taim tru long taim bilong bikpela san, das na win na ren.

Dispela open maket long Peace Pak em i stap klostu tu long Goroka ples balus.

Taim ol balus i pundaun na kirap, win bilong balus tu i save rausim ol ambrela na ol kaikai tu.

Na ol manmeri husat i save kamap long baim ol kaikai long maket tu i save kisim taim.

Dispela i no gutpela long helt bilong pipel bikos em i open maket na ol man, meri na pikinini tu i raun i go-i kam na long taim bilong bung na kamapim ol arapela ektiviti, pasin bilong sosel distensing em i no stap. Long dispela as, sik coronavirus (COVID-19) na ol arapela eabon (air bourne) sik tu i save kalap isi long wanpela man o meri na i go long narapela.

Momalo Sase, Presiden bilong lokal mama grup, Degis Mix Mama, i askim long wanem as na ol lain husat i stap long atoriti i stopim dispela nupela maket na larim ol meri i go na salim ol kaikai samting long dispela open maket.

“ Mi wari tru long ol poro bilong mi husat i save putim bikpela hatwok tru long wokim ol gaden, planim ol kaikai na taim ol kaikai i redi, mipela i save rausim na karim i kam long bikpela maket long salim,” Sase i tok.

“Bikpela ren na san tu i save kukim mipela stat long gaden bilong mipela i kam inap long bikpela maket.

“Wanem taim bai bikpela maket i op? Gavman i mas tok klia long dispela.”

Sase i tok i askim gavman long opim nupela maket nau na larim ol mama long ol i ken sindaun gut na salim kaikai.

Sape Metta i raitim