OL smol holda rais fama long Turubu Lokal Level gavaman long Wewak Distrik, Is Sepik Provins, i lukluk long kamapim 20 tan. Las wik ol i bin milim rais na klinim i kamap olsem rais bilong ol yet long ples.

Wanpela fam i tok:long 2018, ol rais fama long Turubu inlen i groim na milim 16 tan rais. Na nau bai i isi long kamapim 20 tan rais.

Em i tok,  Fud sekyuriti program i givim ol rais long helpim long painim mani bilong skul fii na ol arapla besik nid bilong ol. Em i tok wanpela bikpela hevi nau long wokim gutpela rot i go long ol ples na bai isi long ol pipel i karim ol rais i kam aut long miling masin.

Fama i tok strong moa long ol yet i mas gat wanpela rais mil masin bilong ol. Long dispela taim nau ol i wok long yusim masin long Angoram Distrik na dispela i no gutpela.

Em wokim dispela singaut nau i go long Wewak Distrik Divelopmen Atoriti long lukluk na helpim ol.