WANPELA  man bilong Jiwaka husat i planim wan milien gam diwai, i givim ol pikinini bilong dispela diwai long ol skul long makim Wol Envairomen De (WED) long 5 Jun.

Peter Arem Mek bilong Sigri Wara Ane viles long Not Wagi ilektoret, i givim moa long wan handet pikinini gam tri i go long ol tisa na sumatin bilong Waghi Veli Sekenderi Skul.

Mista Mek i bin givim sampela sidling tu long Giramben Praimeri Skul long Tunde 8 Jun.

"Dispela ol diwai mi givim i fri long ol skul long planim long WED bikos Yunaitet Nesen i putim het tok olsem "Ekosistem Ristoresen" we i min sapos yumi bin bagarapim ol wara o bus, yumi mas ristorim gen.

"Envairomen em i bikpela samting long laip olsem na yumi mas lukautim.

"Pasin bilong planim diwai o tree planting em i gutpela moa. Yumi mas skulim ol pikinini long planim diwai na mentenim ol bus bilong yumi we i bagarap pinis," Mek i tok.

Skul prinsipel bilong Waghi Veli Sekenderi Skul, Betty Wena wantaim ol tisa na sumatin i amamas tru long kisim ol diwai.

"Sapos wanpela man long ples i ken planim wan milen diwai na i lukautim envairomen, em i moa gutpela mipela i skulim ol yangpela manmeri long mekim wankain pasin.

"Dispela em i namba tu taim Mek i givim ol sid bilong ol plawa na gam tri sidling.

"Pasin em i wokim i strongim tingting bilong ol yangpela na ol arapela manmeri long komyuniti long planim diwai long lukautim envairomen bilong yumi," Wena i tok.

Pasin bilong planim diwai tasol i lukim Jiwaka gavana Dokta William Tongamp i givim wanpela nupela Lucas somil na senso i go long Mista Mek long las yia.

Mek i no bin gat driman long wokim bisnis o lukautim envairomen.

Planim diwai em bin kamap olsem wanpela pasin em i save long mekim long fri taim bilong em.

Hoffman Gulgarye i raitim