WANPELA memba bilong Nesenel Palamen i laik riviuim PNG Likuifai Nesenel Ges (LNG) projek agrimen.

Em i tok em i no kisim wanpela gutpela samting long projek maski paiplain bilong ges na LNG Plent Sait i ran na i stap distrik bilong em.

Em i laikim riviu long Ambrela Sering Agrimen (UBSA) na Lenona Benefit Sering Agrimen (LBSA) i mas kamap long givim wankain sea long ol pipel husat i bin kisim bagarap long projek.

Vais Minista bilong Treseri na memba bilong Kairuku-Hiri, Peter Isoaimo, i tok no gat gutpela benefit sering na em i abrusim seksen 98 bilong oganik lo bilong Provinsal na Lokal Level Gavman Ekt.

Em i tok em i wok long toktok wantaim Petrolium Minista, Kerenga Kua long plen bilong riviuim dispela agrimen bilong LNG projek.

“Kairuku-Hiri Distrik Divelopmen Atoriti (DDA) i no benefit liklik long UBSA na LBSA inap foapela yia.

“Pastaim gavana Kila Haoda i wok wantaim mi na em i bin givim mi K5 milien bilong Papa-Lealea rot, K5 milien bilong Boera rot na narapela K9 milien bilong Porebada rot olgeta long Hiri Wes,” em i tok.

Em i tok foapela yia bin go pinis em i no bin kisim wanpela helpim long projek na nau em i toktok wantaim Petrolium Minista long riviuim UBSA na LBSA agrimen bilong beneft sering.

“Mi laikim dairek benefit mas i go stret long Kairuku-Hiri DDA we mipela i ken yusim dispela mani long sapotim sampela ol bikpela projek bilong distrik we distrik impruvmen fan bilong mipela i no inap pinisim,” Isoaimo i tok.

Mista Isoaimo i tok nau yet UBSA na LBSA fan bilong LNG projek em Lokal Level Gavman na Sentral Provinsal Gavman i wok long kisim i stap na distrik bilong em i no kisim wanpela helpim long em yet.

Joseph Dawai raitim