LAS wik National Gaming Control Board (NGCB) i bin holim wanpela seremoni we ol bod na trasti memba i bin mekim tok promis bilong ol long bilong ai bilong Jas long  sevim gut NGCB long taim ol i mekim wok bilong ol.

Dispela em i namba wan taim NGCB i holim dispela seremoni bilong ol bod na ol trasti memba bilong en.

Insait long dispela bod na trasti, i gat ol memba husat i gat bikpela skil na save bilong lidim NGCB i go long gutpela rot. I gat ol lain i makim ol pablik sevan, sios, tred yunien na ol meri na ol arapela.

“Mi bilip olsem wantaim bikpela save ol dispela memba i gat, mipela bai gat bikpela sans long stretim hevi bilong no gat wok insait long kantri. Mipela i laik kamapim planti sans wok bilong ol pipel long PNG,” Siaman bilong Bod, Clemence Kanau i tok.

Mista Kanau i tok bod nau i wok long lukluk long go insait long ol kain kain gem na dispela em bikpela samting tru long histori bilong NGCB.

Em i tok dispela mani NGCB i wokim, bai ol i brukim na serim i go long olgeta provins insait long kantri. Na tu, bai ol i putim ol opis i makim NGCB long wan wan rijon long kantri. Long dispela, han bilong NGCB i ken go aut long olgeta kona bilong PNG.

Em i tok NGCB i laik kamapim stretajik plen long helpim PNG i kamap lida long kain kain pilai laki insait long Pasifik.

“NGCB i save fandim na sapotim gavman bilong PNG. Em i kontribut long baim bikpela takis i go long gavman bilong givim ol sevis long ol pipel bilong PNG,” em i tok.

CEO bilong NGCB, Imelda Agon i tok amamas long Siaman na olgeta bod na trasti memba long kamap hap bilong Bod bilong NGCB. Em i bilip olsem mani NGCB i save mekim bai suruk i go antap long 30 bilien wantaim dispela senis.

“Tenkyu long gat bilip long mipela na makim mipela long kamap bod memba. Nau em i wok bilong mipela long helpim gavman long mekim moa mani long bringim moa sevis long ol pipel bilong PNG,” wanpela bod memba i tok.

Carolyne Ketsimur i raitim