MOA long 2,000 manmeri bilong Bung 3 Wod long Not Wagi ilektoret long Jiwaka bai dring na waswas long gutpela klinpela wara.

Wanpela wara saplai projek we lokol memba Dokta Fabian Pok i putim mani long wokim,  bai i pinisim olgeta wari bilong ol dispela manmeri.

Dokta Pok i givim pinis K2 milen long Niuwara Ltd, wanpela Australia kampani long wokim dispela wara saplai.

Menesing dairekta bilong Niuwara, Brad Fleming, i tokim Wantok Niuspepa olsem ol bin statim projek long mun Mas long dispela yia, na bai ol i opim dispela wara saplai long mun Julai.

“Mipela i gat klostu 200 lokal manmeri husat i putim ol paip pinis,” em i tok.

“Mipela bai kisim tupela Southern Cross wara tenk we wan wan bilong ol bai kisim 100,000 lita wara saplai.

“Dispela bai kisim olsem 20 kilomita wara long paip i kam long Christian Lida Trening Koles na long Bulunts Praimeri Skul long Kar Waghi viles.

“Dispela helpim bai i no inap go long ol pipel bilong Bung 3 tasol long ol komyuniti i stap klostu long ol wod bilong Koskala 2 na Kostala 3, Bung 1 na Bung 2.

Mista Fleming i tok olsem long putim wara paip, kampani i givim wok long klostu long 200 lokal manmeri.

Em i tok moa olsem ol bai i putim tupela Southern Cross tenk long maunten we bai i gat 100,000 lita long wan wan tenk we bai saplaim wara i go long 12-pela liklik tenk ol manmeri i ken yusim.

"Wara bai i ran olsem 20 kilomita stat long het bilong wara na i pinis long CLTC, na i go long Bulunts Praimeri Skul na pinisim long Kar Wagi viles.

"I no ol pipel bilong Bung 3 tasol bai kisim helpim. Olgeta lain husat i stap klostu long dispela hap bai kisim helpim tu.”

Wod kaunsila bilong Bung 3, Mark Berry i tok tenkyu long Mista Pok long givim wanpela impoten sevis.

"Ol pipel bilong mi i bin sot tru long gutpela wara longpela taim tru. Dispela em wanpela jenersen nid.

"Makim maus bilong ol pipel, mipela i tok tenkyu long memba wantaim bel na tingting bilong mipela," Berry i tok.

 Hoffman Gulgarye i raitim