CENTRE For Excellence in Financial Inclusion (CEFI) na Bank of Papua New Guinea (BPNG) i redi long wok wantaim ol provinsal gavman long strongim fainensal inklusen long kantri.

Asisten Gavana bilong Fainensal Sistem Stabiliti Grup, BPNG, Ellison Pidik i bin givim toktok makim Gavana bilong BPNG, Loi Bakani na Siaman bilong CEFI, long taim bilong givim ol setifiket long ol MSME lain husat i bin kisim Fainensal Litresi trening na ol Bisnis Skil Trening long Kavieng, Nu Ailan Provins.

“Em i gutpela tru long lukim CEFI i promotim fainensal inklusen na i wok long kamap gut. Mi amamas long lukim olsem ol trena i bin kisim trening bilong ol trena (TOT) we i bin kamap long Novemba 2020. Dispela save ol bin kisim ol i givim i go long ol arapela,” Mista Pidik i tok.

Em i tok CEFI na BPNG i redi long wok wantaim provinsal gavman na ol pipel bilong Nu Ailan long strongim fainensal inklusen long provins.

Bank i gat luksave olsem dispela em i strongpela pos bilong divelopim kantri PNG. Long dispela trening we i bin kamap long Me 17 i go long Jun 2, i lukim 190 manmeri i kisim ol setifiket bilong ol.

Het trena bilong CEFI, Jill Pijui i tok astingting bilong trening em long givim ol patisipen bisnis skil na save bilong MSME na SME bai ol i ken groim ol bisnis bilong ol i go long narapela level.

Mis Pijui i tok trening i helpim wanpela patisipen long divelopim pis bisnis bilong em taim em i aplai long dinau long Nesenel Diveopmen Bank. Bisnis Trening Skil i helpim ol patisipen long statim bisnis o kamapim ol grup long statim bisnis.

Wanpela patisipen meri, Joanne Peter i tok trening em i kisim long CEFI bai helpim em long yusim ol skil bilong em long kamapim ol bisnis.

“Nau mi ken mekim wok painimaut long maket diman na save long ol nid bilong ol kastoma. Bai mi ken divelopim maket plen, mentenim fainensal rekot na stok rekot,” Mis Peter i tok.

Carolyne Ketsimur i raitim