MINISTA bilong Treseri, Ian Ling-Stuckey, i bin go wantaim Minista bilong Fiseris, Dokta Lino Tom na tim bilong em long lukluk raun long Pasifik Marin Indastriel Jon (PMIZ) long Madang long las wik.

Dispela PMIZ projek em gavman long pastaim i bin opim na i bin stap aninit long Komes na Indastri wantaim bikpela fainensel sapot i kamap long gavman na Exxim Benk bilong Saina.  

Tasol dispela projek i no bin kamap aninit long Komes na Indastri na tude NFA i tekova na i laik bringim gutpela invesmen bilong PNG.

Planti kain kain toktok i bin kamap long dispela projek. MP bilong Sumkar bipo, Ken Fairweather, i bin tok PMIZ em ‘driman toktok tasol’.

Tresera Ling-Stuckey i bin go wantaim Minista bilong Fiseris na Marin Risoses, Dokta Lino Tom na Menesing Dairekta bilong NFA, John Kasu, long lukim wanem kain rot Nesenel Gavman i ken kirapim bek PMIZ olsem wanpela gutpela invesmen na helpim ikonomi bilong kantri.

Bikpela astingting bilong NFA i sanap olsem “Realizing Our Vision of Becoming the Tuna Capital of the World”.

Dispela i min olsem gavman i laik mekim PNG i kamap kepital bilong tuna indastri long wol.

Ol tupela gavman minista i go lukim wanem samting i bagarap na divelopmen i no kamap long PMIZ aninit long lukaut bilong pastaim Komes na Indastri.

Ol i go long eria bilong RD Tuna Fishing long Widar we kampani long hap i kamapim gutpela divelopmen we i gat ol bris bilong ol tuna fising bot bilong en i lain i stap.

Mista bilong Jastis na Memba bilong Madang, Bryan Kramer i bin go wantaim ol long dispela eria bilong PMIZ.

Ol wok lain bilong RD Fising long Widar i soim Tresera Ling-Stuckey na Minista Dokta Lino Tom wantaim Jastis Minista Bryan Kramer long ol fesiliti bilong ol.

Ol i soim ol bris we ol bot bilong ol i save bringim tuna pis i go long hap na bihain ol i save bringim i go long ol bikpela ais bokis na larim ol pis i stap na bihain ol i karim i go long RD Tuna keneri o faktori klostu long Madang taun.

James G. Kila i raitim