BIHAINIM namba wan Sab-nesenel Samit bilong Hailans, Morobe na Madang we i bin kamap long Lae, Morobe Provins long Me, 13. 2021,

Nesenel Dipatmen bilong Egrikalsa (DAL) wantaim Food and Agriculture Organization bilong United Nations (FAO) na Dipatmen bilong Foren Afeas na International Trade (DFAT) i bin holim namba tu sab-nesenel Fud Sistem Samit Dailog (FSSD) bilong ol Niugini Ailan na Sauten Rijon long Fonde 27, Me long Pot Mosbi.

Namba tu Sab-nesenel Fud sistem samit i bin toktok long ol sans ol gavman ejensi wantaim ol malti-stekholda patna i ken wokbung wantaim na lukluk long ol rot bilong divelopim sistem bilong kaikai na stretim bai kamap strong na stap sastenabel.

Meri  i go pas long dispela bung, Regina Nukundji i tok i gat bikpela nid stret long kamapim helti na seif kaikai sistem bilong ol pipel long dispela taim nau we i gat bikpela salens namel long kaikai bilong ples na kaikai we ol i wokim long ol faktori long ol narapela kantri.

Ol lain i makim gavman, praivet sekta, akedemia, meri, NGO, ol fama na ol fisamen bilong Niugini Ailan na Sauten rijon, Diveloping patna, dona ejensi na UN ejensi i bin kontribut long givim tingting taim ol patisipet long dispela bung.

“Mi bilip olsem ol dispela tingting bai givim yumi sans long toktok i go i kam na stretim rot bilong kamapim sastenabel sistem bilong kaikai long PNG. Mi hop olsem ol platform na ol stekholda grup we i kamap bilong sapotim ol dispela toktok bai wok gut na go pas long stiaim PNG long senisim sistem bilong kaikai,” ripresentetiv bilong FAO PNG, Ken Shimizu i tok.

Dispela tupela Sab-nesenel bung i kamap bilong redi long Nesenel Fud Sistem Samit Dailog (NFSSD) we bai kamap long Pot Mosbi long dispela mun. Olgeta patna bai bungim olgeta toktok we i kamap long dispela tupela bung na redim proses bilong kisim Sastenabel Divelopmen Gol long 2030.

Ol autkam na autput bilong Nesenel Dailog Samit bai kontribiut i go long ol toktok we bai kamap long Global UN Fud sistem Samit we UN Seketeri Jenerel bai holim long Septemba 2021.

Carolyne Ketsimur i raitim