PAPUA Niugini i bungim hevi long wok ikonomi bilong em long taim bilong coronavirus (COVID-19).

Tasol dispela i no tru long Paradise Food Limited husat i wok long go het yet  long kamapim ol prodak na kisim bikpela namba bilong ol wok manmeri.

Sif Ekseketiv Opisa (CEO) bilong kampani James Price i bin tokaut long dispela long taim Praim Minista James Marape i bin go lukluk raun long faktori long Gordens, Pot Mosbi.

Nau yet i gat 1500 ol lokal manmeri i wok long Paradise Food kampani na175 em ol nupela lain kampani i bin kisim long taim bilong COVID-19 pandemik.

Price i tok kampani i lukluk long ol gaden kaikai em ol fama i planim na i bringim i go long salim.

Marape i amamas long kampani i baim ol gaden kaikai long ol fama.

“PNG i no gat planti kain kampani mekim olsem,” em i tok.

“Gavman i lukluk tu long kamapim ol faktori tu olsem yumi inap baim ol kaikai bilong yumi yet na mekim ol samting long hia.”

Kampani i kamapim ol prodak olsem Queen Emma Premium chocolate bren long promotim PNG kakao long wol maket wantaim Gala Ais Krim.

Em i tok PNG i gat gutpela soklet em kampani i save wokim.

“Mipela i amamas long Praim Minista James Marape i kam long lukim Paradise Food na misin bilong mipela em long helpim ol pipel bilong PNG pastaim.

“Long mekim dispela mipela mas kamapim wok bilong olgeta long produsim na baim kakao bilong ol lokal fama long Bogenvil, Sentral, Oro, Morobe, Is Sepik na Is Nu Briten long wokim Queen Emma Chocolate insait long kantri,” em i tok.

Joseph Dawai i raitim