Pat 1: Wokbung wantaim Enga Baptis Helt Sevis, Kompiam

MIPELA long MAF i save lukluk long wokbung wantaim ol lain husat inap long wok wantaim mipela long inapim spiritual na ol arapela nids bilong ol komyuniti long ol longwe ples. Long 2017, i bungim Dokta David Mills, medikol suprintenden bilong Enga Baptis Helt Sevis, na toktok wantaim em.

Dokta Mills i tok, “ Nau yet, mi save wokabaut i go mekim helt patrol long samting olsem 10-pela komyuniti. Bai mipela i wokabaut inap tupela o tripela de long go na kam bek long sampela ples, olsem na mi save lukim wanpela komyuniti wanpela taim tasol long wan yia. Mi lusim bikpela taim long wokabaut i go i kam olsem na mi no inap lukim ol sikmanmeri husat i nidim helpim. Sapos mi inap flai i go long ol dispela komyuniti, bai mi inap long go lukim ol samting olsem foapela taim long wan yia.”

 Dispela bung wantaim Dr Mills i kamapim dispela program bilong Kompiam Helt Patrol, we MAF i karim tim bilong ol moa long 30 taim long i go long 7-pela komyuniti ol i save wok wantaim long Enga na Is Sepik provins.

Seplin bilong haus sik i save go tu long dispela patrol long. Long apinun em i save soim ol muvi bilong Jisas long komyuniti. Dispela i mekim ol patrol i bihainim lekmak bilong Jisas we ol i stretim ol sikmanmeri na long wankain tu ol i autim tok bilong God.

Helt Patrol i go long Malaumanda

Long pinis bilong mun Epril, ol 8-pela wokmanmeri bilong Kompiam rurel haus sik i bin go long Malaumanda. Long taim ol i kamap long hap, ol i lukim 168 sikmanmeri, sampela i gat grile long skin, sampela i gat nimonia, sotwin na ol bun bilong han o lek i pen.

Ol i givim 436 banis sut long ol pikinini, Pentavalent bilong banisim sik dipteria, tetanus, huping kof, hepataitis B na Haemophilia influensa type B. Na ol arapela sut bilong misels-rubela, polio na Vitamin-A saplamen.

I no bin gat wanpela helt patrol long 2020 bikos long COVID-19 pandemik, olsem na ol i givim planti banis sut long ol bebi na ol i givim ol busta sut long ol pikinini husat i skul.

Dispela tim i testim tu ol pipel long malaria, HIV, hepataitis na haemoglobin na tu, ol i mekim awenes long pasin bilong lukautim gut ol tit, nutrisen, HIV na COVID-19.

Dokta Rebecca Williams husat i go pas long tim, em i medikol suprintenden bilong Kompiam Distrik Hospital bilong Enga Baptis Helt Sevis.

Em i namba wan taim bilong em long go long Malaumanda. Em i tingim dispela ples longwe we i no gat gutpela rot bilong komyunikesen.

“Mipela i stap wanpela de moa bikos i bin gat wampela teknikel hevi i kamap. Em i namba wan taim bilong mi long go long Malaumanda. Dispela ples i stap longwe tru na ol maunten i raunim. Sapos ol pipel i laik go long Wewak bai ol i mas wokabaut tripela de long busrot na narapela tripela de gen long moto kanu. I no gat ol arapela ples i stap klostu we ol lain i ken wokabaut wanpela o tupela de. Dispela i narakain tru long ol eria mipela i save go lukim.

“Mi harim ol Malaumands em i hap bilong Laigam Distrik long Enga tasol em i stap aninit long Is Sepik provins bikos em i stap long boda namel long tupela provins. Ol pipel i gat narakain tokples tasol ol inap long harim tokples Enga.”

Salens long komyunikesen

“Long taim mipela i wetim balus, mipela i no gat rot long painimaut wanem taim balus bai kam o sapos i gat sampela hevi i kamap. Ol lain bilong New Tribes Mission i bin putim wanpela HF redio tasol em i bagarap. Mipela inap long harim ol lain i toktok tasol ol i no inap harim mipela bikos i gat hevi long trensmita. Ol mobail fon tu i no wok long Malaumanda. Ol pipel i mas wokabaut 3-4 aua i go antap long maunten we ol i ken yusim mobail fon.

“Long dispela taim, mi luksave long hevi ol pipel i save pilim long taim ol i sik nogut tru o sapos mama i laik karim bebi na i nidim helpim hariap. Ol i no gat rot long salim tok long kisim helpim hariap. Long taim ol i harim krai bilong balus, ol bai pilim orait, bikos ol i save bai ol i kisim helpim nau.

Ol dispela samting i mekim mi i luksave long bikpela helpim bilong mobail fon, ol rot bilong wokabaut, na bikpela samting tru em helpim bilong MAF long ol pipel bilong dispela hap we no gat arapela lain i save wari long ol.

“ Mi helti na fit long wokabaut, tasol mi no ting bai mi inap long wokabaut tripela de na ran long kanu tripela de long kamap long taun. Em i bikpela hatwok tru long sikman o papa i karim sik pikinini o man i karim belmama na bihainim dispela we bilong kisim helpim.”

Salens bilong kisim medikol sevis

“ Ol dispela pipel bilong Malaumanda i mas pilim nogut tru long tai mi no gat rot bilong kisim helpim long taim ol i sik. Ating ol pipel long taun i mas pilim wankain long taim ol i go long haus sik tasol dua i pas bikos long COVID-19.

  “ Dispela eksperien bilong COVID-19 long ol taun na sit ii mas helpim yumi long luksave long ol hevi ol pipel bilong yumi long ol bus ples, na helpim yumi long sapotim na skruim sevis bilong MAF long kantri.”