SMALL Business Tax (SBT) em takis we ol liklik bisnis i mas baim i go long Internal Revenue Commission (IRC). SBT em i tingting we Marape Gavman i bin kamapim long 2019 bilong daunim pe bilong takis we ol liklik bisnis i ken baim.

Wantaim SBT nau, ol liklik bisnis we wanpela man or meri tasol i operetim bai stat long baim takis.Tasol dispela takis i no bikpela. Em i liklik tasol.

Yumi olgeta i mas baim takis sapos yumi laikim divelopmen long ol provins na kantri bilong yumi.

Long taim bilong opim SBT, CEO bilong IRC, Sam Koim na Deputi Praim Minista na Minista bilong Komes na indastri, Sam Basil i bin givim ol gutpela toktok bilong strongim ol liklik bisnis long baim takis na kontribut i go long ikonomi bilong kantri.

Komisina Sam Koim i bin tok tenkyu long olgeta lain husat i bin kamap long dispela bung na Deputi Praim Minista tu long kamap long lonsing bilong SBT.

“SBT i kamap bilong daunim hevi bilong baim takis. Mipela i luksave long Marape gavman i tingting long helpim ol liklik bisnis long kamap fomal na kontribiut i go long ikonomi bilong kantri,” Mista Koim i tok.

Mista Basil i tok i em i amamas tru long lukim dispela gutpela wok bilong IRC. Em i tok gavman i sapotim ol Micro Small and Medium Enterprises (MSME) long kantri na i laik kamapim planti bisnis manmeri long PNG na strongim ol long dispela taim bilong COVID-19.

Mista Basil i tokaut tu olsem gavman i sainim Memorandum ov Understanding (MoU) wantaim Bismark Maritime long freit sabsidi bilong helpim ol fama long ol rurel eria long salim ol gaden kaikai bilong ol.

Carolyne Ketsimur i raitim