STRET Pasin Stoa (SPS) em i program we i bin kamap bilong sapotim ol lokal bisnis long PNG.  Bikpela hevi we i save pasim ol lokal bisnis long gro na win em nogat inap mani bilong mekim bisnis.

Tupela go pas risets opisa bilong Nesenel Risets Institiut (NRI) Dokta Francis Odhuno na Thompson Honga i bin holim wanpela bung long dispela wik, Tunde 1, Jun, 2021 long tokaut long ol risal bilong wok painimaut tupela i bin mekim long dispela program.

Tupela i tok long risets o wok painimaut bilong ol, ol i painimaut olsem, SPS program i bin kamapim gutpela wok long ol lokal bisnis bilong PNG long ol yia 1970, 1980 na 1990. Sampela bilong ol dispela lain i stap yet i tok ol i laik bai dispela program i mas kirap bek long sapotim driman bilong gavman long kisim bek PNG.

Carolyne Ketsimur i raitim