OL pipel i mas lukaut gut long wanem kain benk o fainensel institusen ol i putim mani bilong ol long en.

Dispela tok lukaut i kam long Bank of Papua New Guinea (BPNG) bihain long sampela lain i wok long raun na kisim mani long ol pipel long statim ol fainensel institusen.

Gavana bilong BPNG, Loi Bakani i putim wanpela pablik toksave long niuspepa long ol pipel i lukim na lukaut gut long ol dispela konman.

Mista Bakani i tok BPNG tasol i ken givim laisens long ol benk na fainensel institusen. Em i tok ol i aplai long kisim laisens na bihain long BPNG i givim tok orait, em nau bai ol i mekim wok bilong ol.

Olsem na Mista Bakani i tok ol pablik i no ken harim giaman toktok bilong ol man nating husat i raun bungim mani long kirapim wanpela fainensel institusen.

Em i tok ol pipel i mas ripot long polis sapos ol kain lain olsem i giamanim ol na kisim nating mani.

Mista Bakani i tokim ol pipel long yusim sevis bilong ol laisens fainensel institusen bikos ol i bihainim lo bilong BPNG long lukautim mani bilong ol kastoma. Em i givim tu wanpela adres long intanet we ol pipel i ken sekap na lukim ol laisens fainensel institusen bilong PNG.