PLES balus long Wapenamanda nau i op pinis na i redi long operesen. Minista bilong Sivil Eviesen na Memba bilong Saut Flai, Sekie Agisa na gavana bilong Enga, Peter Ipatas i bin opim ples balus las wik.

Dispela em gutpela nius long ol pipel bilong Enga husat i save trevol i go i kam long Enga yusim rot.

Mentenens bilong Wapenamanda ples balus i hap bilong Civil Aviation Development Investment Program (CADIP) we gavman bilong PNG na Asian Divelopmen benk i fandim.

Astingting bilong CADIP em long kamapim tru namba wan driman bilong PNG Gavman long stretim olgeta ples balus long kantri long mitim standet bilong International Civil Aviation Organization (ICAO) na seifti na sekyuriti bilong Civil Aviation Safety Authority (CASA). Na long wankain taim impruvim level bilong sevis balus na ol pasindia.

Bikpela wok ol i mekim pinis na liklik wok i stap yet. Wok i stap yet em bilong stretim nupela pasindia teminal bilding, hap bilong putim kar na ol fesiliti bilong teminal.

NAC i tok maski COVID-19 i bin kamapim planti salens, wok i bin go het na em i tok tenkyu long ADB, PNG Gavman, Enga Provinsal Gavman, Lokal komyuniti na kontrakta Lorma-Sorco JV long hatwok bilong olgeta long kamapim tru dispela wok.