OL KAKAO fama long Aiom long Midel-Ramu distrik long Madang nau i wok long salim kakao bilong ol long Usino kakao depo long Usino Bundi distrik.

Opim bilong nupela depo i sevim gut ol kakao fama long tupela distrik, Usino-Bundi na Midel-Ramu.

Dispela em bihain long wanpela kakao baia kampani, Linguan i kamapim kakao depo long Usino stesin.

Papa bilong Linguan kampani, Michael Linguan i tok kamap bilong depo i bihainim bung bilong ol wantaim Minista bilong Edukesen na MP bilong Usino-Bundi, Jimmy Uguro long sainim agrimen wantaim PNG Kakao Indastri Bod long givim laisens long baim kakao.

Long wankain taim, Kampani Kakao Asesa Jordan John i tok ol i baim drai bin kakao long prais we i abrusim mak liklik i go antap moa long mak ol kakao baia long Madang taun i baim kakao long em.

“Ol fama long Aiom i wok long salim gutpela kwaliti drai kakao bin,” em i tok.

“Kain kwaliti em ol baia i laikim na dispela i bihainim mak wol maket i laikim long em.”

Presiden bilong Usino LLG, Peiwa Aimai i askim ol lokal komyuniti long Usino long lukautim gut dispela egrikalsa sevis.

“Memba i bringim sevis i kam long haus dua bilong yupela na yupela i mas lukautim,” em i tok.

Wod 17 kaunsila long Iguruwe viles, Pomai Noyesia i amamas long dispela sevis.

Em i tok nupela drai bin kakao baia bai helpim ol long no ken lusim nating mani long trenspot na karim kakao i go long Madang taun.

“Mi amamas bikos ol i baim stret kakao long haus dua bilong mipela,” Pomai i tok.

Em i tok tu olsem kampani i save baim ol stret wantaim kes mani moa long ol baia long Madang taun we ol i save baim long sek mani.

James G. Kila i raitim