GAVMAN i givim olsem K1.65

milien long ol pipel bilong Duke ov York Ailan long Kokopo, Is Nu Briten Provins long kamapim ol projek.

Minista bilong Nesenel Plening Renbo Paita i givim dispela mani taim em i go long Is Nu Briten long las wik.

Wanpela bilong dispela ol projek i bilong baim ol sola lait olsem ol manmeri i ken stap long lait long nait.

Moa yet, dispela bai helpim ol sumatin long mekim wok bilong ol nait taim ol i stadi.

Minista Paita i givim mani mak bilong K180,000 long baim na sanapim ol sola lait.

Ol arapela projek we Duke ov York Lokal Level Gavman (LLG) i bin makim em long kamapim sampela ol eko-turisim bisnis olsem kamapim ol ges haus na ples bilong malolo na kuk long ailan we ol turis i ken go na stap.

Narapela em long kamapim ol gutpela klinpela wara bilong dring.

Paita i bin givim dispela mani long Kabilomo Praimeri Skul.

Minista i bin go wantaim vais Minista bilong Nesenel Plening na Monitering na Memba bilong Kokopo, Emil Tammur.

Tammur long wankain taim, i tokaut tu long em i joinim Pangu pati bihain long em i tokaut long lusim Pipel Progres Pati (PPP) we em i bin stap na i bin joinim taim em i win long 2017 Jeneral Ileksen.

Long dispela taim ol pipel bilong DOY i bihainim pasin kastom na i mekim Paita i kamap sif bilong ol.