“OL ripot bilong PNG Extractive Industries Transparency Initiative (PNGEITI) bai no gat mining bilong em sapos em i no kamapim strongpela polisi toktok bilong kamapim gutpela maining na petroleum sekta long Papua Niugini,” Man i go pas long PNGEITI Nesenel Seketri , Lucas Alkan i tok.

Em i tok wok bilong EITI em long promotim trensperensi na akauntabiliti long mani kantri i save kisim long maining, wel na ges, na rot kantri i yusim dispela mani.

Stat long taim kantri i bin joinim ol arapela EITI kantri long 2014, PNG i kamapim pinis 7-pela EITI kantri ripot bilong em.

Ol dispela ripot i save kamap olgeta yia bilong promotim trensperen na akauntabel bisnis insait long maining na petroleum indastri.

Mista Alkan i tokim ol lida long namba 36 bisnis forum bilong Australia na PNG long Trinde olsem wok bilong EITI long PNG i kamap gut na i helpim long karimaut ol pablik polisi toktok yusim ol EITI ripot na ol diskasen bilong PNGEITI Malti Stekholda Grup (MSG). Dispela forum i bin kamap las wik.

Mista Alkan i tok gutpela wok i kamap stat long taim PNG i mekim namba wan ripot long 2015.

Sampela bilong ol impruvmen  i kamap bikos long wok bilong EITI em;

• EITI i wok wantaim ol arapela inisetiv bilong gavman olsem Open Gavman Patnasip (OGP) na Indepenent Commission Against Corruption Law (ICAC).
• Long namba wan ripot bilong EITI, ol i bin impruvim Inkam takis Ekt long rausim ol hait pasin we i stap long Ekt, bai IRC i ken givim data bilong Takis mani i go long EITI long putim long ripot bilong em.
• EITI i kamapim wanpela platfom bilong ol kain kain stekholda i ken bung wantaim na toktok long kamapim tras namel long ol.
• EITI nau i stat long mekim ripot long sab-nesenel level bilong gavman na i apim trensperensi bilong ol bisnis bilong gavman.

Dispela em ol sampela bilong ol impruvmen EITI i mekim long PNG.  I gat moa i stap. Moa long dispela, Kebinet i bin tok orait long  Nesenel Polisi Fremwok long Trensperensi na Akauntebiliti long 2018.

EITI PNG bai kamap nau olsem independen edministretiv bodi long strongim wok bilong em. Draft lo bilong em ol i pinisim pinis.

Carolyne Ketsimur i raitim