Ricky Poki em wanpela yangpela man i gat laisens bilong flaim balus tasol em i save wok long opis na helpim kantri dairekta bilong MAF. Las wik yumi ritim stori bilong em i kisim malolo long wok long opis na go flai wantaim pailot Philipp.

Ricky i gat planti stori na dispela wik yumi go raun gen wantaim em long wanpela balus ran bilong em wantaim dispela stori.

Ricky i stori.

Mi gat laisens bilong flaim balus tasol mi pilim orait stret long wok long opis. Namba wan taim mi bin flai gen long balus planti tingting i bin kam long mi na mi askim mi yet, “Mi inap mekim dispela wok?” Tasol nau bihain long sampela wik mi kisim bel isi nau. Em i gutpela olsem nau mi stat tingting olsem pailot.

Ating Ricky i laik flaim balus stret? Yes! Em i tok.

Tasol mi gat bikpela rispekt long ol pailot bilong MAF bikos mi lukim ol i save mekim bikpela wok stret.

Mi save ting ating ol pailot long bikpela balus i no save mekim planti wok tasol mi no stap longpela taim long dispela indastri long tok olsem.

Tasol las wik mi raun na helpim wantaim ol liklik wok na mi lukim stret ol wok ol MAF pailot I save mekim. Mi pilim olsem wok bilong putim ol sia i go bek em bikpela wok tru. Tasol taim mi mekim moa bai mi lainim sampela samting na wok bai i isi.

Na tu Philipp em rait man! Em skulim mi long planti samting. Em skulim mi long pasin bilong lukautim balus na soim olsem em i kea long olgeta liklik samting olsem klinim balus, putim gut ol kago long balus na stap olsem gutpela wasman. Mi tenkyu tru long ol skul mi kisim long Philpp. Em wanpela gutpela tisa tru na taim mi nidim lainim em i skulim mi.

Long mi, dispela wanpela wik mi raun wantaim Philipp em wanpela gutpela wik tru bilong mi. Mi pilim olsem mi lainim planti samting tru long wanpela wik tasol.

Taim mipela i flai i go long ol rurel ples mi pilim olsem i gat planti moa samting long dispela ran.

Mipela i bin mekim wanpela balus ran long Fraide, em pablik holide na mipela i karim ol pasindia i go long wanpela bus ples. Mi lukim ol pipel na mi lukim olsem ol i laik stret long go long ples.

Taim mipela i flai raun long kantri na mi lukim ol maunten na ol ples i stap na mi save tingting, olsem wanem ol pipel i stap long kain ples we i no gat rot long en?

Mi bikpela long Pot Mosbi na taim mi lukim ol ples i stap olsem ai bilong mi i op. Hau bai ol pipel i stap long ples olsem?

Na bai mi askim Philipp. Wanem samting i mekim mi spesel na mi bikpela long siti? Hau mi lukim ol samting nau ol arapela pipel i no inap lukim wankain.

Na Philipp i tok, yu save, em grasia bilong God.

Mi tok tenkyu long God bikos em i putim mi long dispela hap. Na mi pilim olsem mi kisim strong long helpim long wanem kain wei mi inapt aim mi stap wok long opis.

Mi pilim olsem God i putim mi long siti long kam bek na helpim olsem bai wanpela long rurel ples i ken wanpela de lukim wanem samting mi wok long lukim. Dispela skul i opim ai bilong mi tru.

I gat planti as na ol pipel i save flai wantaim MAF. Long wik mipela i flai tupela pikinini meri long ples Kawito i laik go bek long skul na ol i mas kalap long balus long dispela de. Em wanpela salens de bilong mipela. Komyunikesen i no bin ran gut na mipela i putim wanpela narapela pasindia pinis long balus. Nau mipela i mas skelim husat i mas go pas na husat i mas wet long narapela ran bilong balus.

Em wanpela salens disisen ol pailot i mas mekim long wanem ol MAF balus i liklik na i nogat planti sia long ol. Long wankain taim planti moa pipel  laik kalap long balus na go long wanem hap ol i laik go long en.

Mi lukim planti sumatin na ol tisa i laik go bek long skul bihain long holide bilong ol i pinis. Mi lukim tu ol famili na ol kopi fama i yusim sevis bilong MAF.

Mipela i save karim tu ol kago. Long wanpela ran mipela i karim ol nudels, wel bilong kuk na sop i go long Wanakipa. Ol liklik samting olsem ol pipel i nidim.

Mi tingim olsem MAF i givim wanpela impoten sevis tru long ol rurel pipel. Na taim mi putim o rausim kago long balus, mi no wari long tuhat na mi lus tingting pinis olsem em i hat wok. Mi pilim pulap tru na amamas long dispela wok.

MAF i redi nau long salim Ricky i go long Amerika long stap insait long wanpela spesel MAF US Pailot divelopmen program. Plis pre wantaim MAF long Ricky i go stap long dispela program na driman bilong em long flaim wanpela MAF balus i ken kamap tru.