OL 25 pipel long Westen Hailans provins i pinisim trening bilong skulim ol fama long helpim ol famili i wok bung wantaim long wok fama na lukautim gut mani ol i kisim long hatwok bilong ol.

Dispela Trening bilong ol Trena (ToT) long Viles Famas Laivlihud Impruvmen Trening (VLIT) i kam aninit long Fres Produs Divelopmen Ejensi na Maket bilong ol Viles Fama Projek (MVF) i go pas long en.

Ol dispela 25 trena i kam long Pipels Eksen fo Rurel Divelopmen (PARD), Fres Produs Divelopmen Ejensi (FPDA), Dipatmen bilong Egrikalsa na Laipstok (DAL) na ol arapela grup bilong fres produs long Westen Hailans. Namel long ol em ol 9-pela meri.

Dispela trening i strongim kontribusen bilong ol meri long wok fama na helpim ol famili long toktok gut na bung wantaim long wok na lukautim gut mani ol i kisim long fam bisinis bilong ol.

CEFI-MVF projek kodineta, Sebastian Mugup i tokim ol dispela lain long kisim dispela save bilong ol i go bek long ples na givim trening long ol fres fud fama.

“Dispela trening i bilong strongim ol famili. Yupela i kisim save nau long senis pes bilong ol famili fam bisnis long kantri,” Mista Mugup i tok.

Em i luksave tu long helpim bilong Care International (PNG) PARD, IFAD, DAL na Nesenel Gavman long sapotim egrikalsa bisnis long kantri.

Jenny Steven, wanpela stroberi fama bilong Westen Hailans i tok tok tenkyu long CEFI na Care International long dispela trening na em i tok dispela trening bai helpim em wantaim komyuniti bilong em.

“ Mi wanpela trena na em i wok bilong mi long skulim ol arapela fama long ples na kirapim tingting bilong ol man long sindaun wantaim meri bilong ol na toktok long rot bilong lukautim mani bilong famili.

“Ol papamama i ken skulim tu ol pikinini bilong ol long pasin bilong sevim gut mani ol i kisim long hatwok bilong ol, long benk.”

Moa long 25,000 fama famili long 6-pela provins, Westen Hailans, Jiwaka, Simbu, Isten Hailans, Morobe na Is Nu Briten bai kisim trening aninit long Viles Famas Laivlihud Impruvmen Trening.