GAVMAN i givim K1 milien long Is Nu Briten long sapotim ol lokal fama long planim moa kakao long provins.

Moses Burin bilong Niugini Ailans Kakao Kopresen i tok gavman i givim K1 milien long planim moa kakao na long wankain taim, rot bilong kamapim kwaliti drai kakao.

Em tok dispela mani em provinsal gavman i brukim namel long 29 kopretiv sosaiti long provins.

Em i tok gavman i givim daireksen long yusim dispela mani long planim kakao na long wankain taim yusim mani na apim prais bilong baim kakao.

Dispela em ol i kolim prais sabsidi.

Burin i tok ol i skelim dispela mani bihainim tok orait i kam long gavman long sabsidaisim prais long helpim ol fama.

Em i tok ol i kisim K15,000 i go inap long K20,000 long dispela program.

Em i tok dispela bai kirapim bel na tingting bilong ol fama long wok hat na planim moa kakao.

Burin i tok tu olsem sampela fama i kisim pinis namba wan na namba tu hap bilong helpim mani.

Em i tok long ol fama i kisim helpim ol i mas bihainim rot kakao bod i makim long em.

Em i tok ol i mas i gat fementri o haus paiaman, kisim trening bilong mekim na menesim fementri na kamapim kain drai kakao we i bihainim kwaliti bilong wol maket.

Burin i tok ol fama i no inap long kisim dispela helpim mani inap long ol i bihainim tru dispela ol askim em Kakao Bod i askim long em.

Em i tok ol i mekim olsem bikos ol i laikim ol fama i mas kamapim gutpela kwaliti drai kakao.

Michael Novingu i raitim