Yu laik kamap pailot bilong liklik balus na flai long ol rurel ples long Papua Niugini? Ritim dispela
namba wan hap bilong stori bilong Ricky Poki wanpela yangpela pailot i wok wantaim MAF.

RICKY Poki i bin stat wok olsem ekseketiv asisten long MAF PNG kantri dairekta long Maunt Hagen. Em i
save stap tasol long opis. Tasol dispela yia em i kisim sans bilong em long lukim Papua Niugini taim em i
flai antap long balus.
Wanpela samting bai i stap oltaim long bel na tingting bilong Ricky em taim em sindaun wantaim sif
pailot long balus na go long ol ples long ol PNG.
Insait long wanpela wik ol de bilong Ricky i save go olsem. Long Mande ol bai i flai i go olsem long
Balimo, Kawito na Daru em ol arere ples bilong PNG long Westen Provins. Long Tunde na Trinde ol bai i
ran i go long Simbai, Madang Provins na helpim ol kopi fama long karim ol kopi bilong ol i go long maket.
Long ol dispela ran Ricky i save kisim bikpela amamas long helpim pailot mekim sampela wok.
Long Fonde ol i save ran i go olsem long Tari na Wanakipa long Hela Provins. Ricky i tok Wanakipa ples
balus taim yu stap antap na lukluk go daun olgeta gras long skin bai sanap. Em wanpela ples balus we
balus i save bihainim wanpela rot tasol long go insait na kam ausait gen. Yu bai ting em pinis bilong mi
nau. Ating Simbai em wanwe ples balus tu tasol dispela Wanakipa ples balus em mekim mi bin pret tru.
Tasol em i bin namba wan taim bilong mi long go long kain ples balus olsem. Na planti kainkain tingting i
bin kam long het bilong mi. Tasol taim mi kisim tingting olsem God i stap mi save kisim bel isi.
Na mi olsem pailot mi mas gat strongpela tingting mi tokim mi yet. Mi kisim trening pinis na mi mas
strong. Mi lukim dispela long Philipp, sif pailot. Hau em i save sekim ples balus na em bai sekim gen
namba tu taim na sekim gen namba tri taim. Dispela i soim olsem MAF i skulim mi gut tru long mekim
gut wok bilong mi na em i putim mi long wanpela mak em i narakain long ol arapela.
Papua Niugini i save gat sampela salens bilong en yet.
Ricky i tingim wanpela taim ol i bin mekim sampela ran long Tari na Wanakia long wanpela de. Ol i go i
kam na ren, win na san tu i wok long senis. Sampela hap ren i kam daun, na sampela han ples i drai.

“Taim mi lukim dispela mi tingim olsem sampela taim em i hat long plenim ol ran bilong balus,” Ricky i
tok.
“Yu mas bihainim tu toktok bilong ren, win na san na redi long senisim ran bilong balus. Mi save amamas
tru long lukim hau ol MAF pailot i mekim ol senis olsem,” em i tok.
Wanem ol narapela samting ol pailot i save mekim?
Long flaim balus em wanpela samting na stiaim balus antap long skai em narapela samting. Tasol ol
pailot i mas komyuniket na harim gut ol toktok tu bilong trefik. Ol pailot i mas mekim planti liklik wok
long wanpela taim na mi salut long ol long wanem em i planti wok tru. Na taim ol i bringim balus i go
pundaun gut long ples balus ol i mas rausim ol kago na stretim ol sia.
Mi save ting wok bilong pailot em wanpela kaks wok stret na mi bai amamas na flaim balus tasol. Tasol
nogat. Long flaim liklik balus pailot i mas mekim olgeta arapela wok tu na em i hatpela wok.
Mi save amamas long helpim pailot Philipp. Mi tingim hamas wok em na ol arapela pailot i save mekim
taim ol wan wan yet i save go long ol rurel ples balus. Na taim ol i save kam bek ol i save luk olsem ol i no
mekim wanpela bikpela wok.
Na mi, taim mi kam bihain long namba wan ran bilong mi, ol pren i tok amamas long mi na ol i tok,
“Ricky, go long haus! Yu luk skin dai!”
Olsem na mi save ting, ol pailot ya i save wok olsem wanem? Ating ol i save pinis long dispela kain wok
na em i gutpela na em i stap long blut pinis. Tasol ol i save wok hat tru. Mi lukim ol MAF pailot na mi
sakim het tasol, na mi gat bikpela rispekt tru long ol.